Ақмола облысында өмір бойына көлік жүргізу құқығынан айырылған мас жүргізуші ұсталды, – деп хабарлайды Polisia.kz.
15 қаңтар сағат 02:00 шамасында жол қозғалысын қадағалау барысында “Бақай 18П1” автопатрулінің экипажы құрамындағы Арман Блялов пен Нұржан Жамалиев Заводское кентінде 45 жастағы жергілікті тұрғынның басқаруындағы Toyota Corolla көлігін тоқтатты. Ер адам апаттық тоқтату туралы сигналды өшірмей жүріп келе жатқан.
Жүргізушіден алкогольдің иісі шығып тұрды. Медициналық куәландыру қорытындысына сәйкес, ақмолалық “орта дәрежелі” мас күйінде болған.
Деректер базасын тексеру кезінде бұл азаматтың өмір бойына көлік құралдарын басқару құқығынан айырылғаны анықталды.
Осы фактіге сәйкес, ҚР ҚК-нің 346-бабы 1-бөлігі (Көлік құралдарын басқару құқығынан айырылған және алкогольдік, есірткілік және (немесе) уытқұмарлық масаң күйде болған адамның көлік құралын басқаруы) бойынша сотқа дейінгі тергеу жүргізіліп жатыр. Көлік айыппұл тұрағына қойылды. Күдікті уақытша ұстау изоляторына қамалды.
