Атырауда дүкеннен спирттік ішімдіктерді ұрлаған ер адам қоғамдық жұмысқа тартылды, — деп хабарлайды Polisia.kz.
Атырау қаласында дүкеннен спирттік ішімдіктерді ұрлаған ер адамға қатысты сот үкімі заңды күшіне енді.
Іс материалдарына сәйкес, сотталған азамат дүкеннен спирттік ішімдіктерді жасырын жымқырып, нәтижесінде жәбірленушіге 19 171 теңге көлемінде материалдық залал келтірген.
Сот ер адамды Қазақстан Республикасы Қылмыстық кодексінің талаптарына сәйкес кінәлі деп танып, оған 100 сағат қоғамдық жұмысқа тарту жазасын тағайындады.
Сот үкімі заңды күшіне енгеннен кейін сотталған азамат Атырау қаласының пробация қызметінің есебіне қойылды. Пробация қызметінің қызметкерлері оған жазаны өтеу тәртібі мен шарттарын түсіндіріп, белгіленген талаптарды сақтау жөнінде профилактикалық түсіндіру жұмыстарын жүргізді.
Атырау облысы бойынша қылмыстық-атқару жүйесі департаментінде қоғамдық жұмыстарға тарту жазасы сотталған азаматты қоғамнан оқшауламай, оның жасаған әрекетінің салдарын түсінуіне, еңбек арқылы түзелуіне және қайта қылмыс жасаудың алдын алуға бағытталғанын атап өтті. Сонымен қатар пробация қызметі сотталғандардың мінез-құлқын бақылап, олардың қоғамға бейімделуіне ықпал етеді.
