Көкшетауда полицейлер із-түзсіз жоғалған кәмелетке толмаған қызды тапты, – деп хабарлайды Polisia.kz.
Ағымдағы жылдың 21 мамырында сағат 23:30-да Көкшетау қаласының ПБ “102” пультіне 39 жастағы ер адамнан 15 жасар қызын іздестіру шараларын қабылдау туралы телефон хабарламасы келіп түсті, ол 21 мамырда шамамен сағат 19:00-де үйден кеткен және оның орналасқан жері белгісіз. Әкесі қызы құрбыларымен бір жерде серуендеп, жақында үйге келеді деп үміттенген, бірақ олай болмады.
Полиция қызметкерлері дереу іздестіру шараларын ұйымдастырды. Із-түзсіз кеткен оқушыны іздеуге қылмыстық іздестіру қызметкерлері, учаскелік полиция уәкілдері және ювеналды полиция инспекторлары бағытталды.
Тәртіп сақшылары барлық маңайды тексеріп, жоғалған адамның туыстары мен таныстарынан жауап алып, оның әлеуметтік ортасын зерттеді. Көкшетау қаласының барлық камералары қаралды.
Жүргізілген жұмыстың нәтижесінде қыз көп ұзамай Көкшетау қаласының көшелерінің бірінен табылып, полиция бөліміне жеткізілді. Балаға қатысты қандай да бір заңсыз әрекеттер жасалмады. Кәмелетке толмағандар ісі жөніндегі бөлім қызметкерлері қызбен әңгіме өткізді.
Полиция азаматтардан кәмелетке толмаған балаларына мұқият болуды және оларды қараусыз қалдырмауды, сондай-ақ әрқашан олармен ортақ тіл табуға тырысуды сұрайды. Сондай-ақ тәртіп сақшылары жақын туыстарының бірі жоғалған жағдайда дереу көмек сұрап, өз бетінше іздеуге уақыт жұмсамау керектігін айтады.
