Маңғыстау облысы Мұнайлы ауданында пробация есебінде тұрған және мерзімінен бұрын шартты түрде босатылған азаматтар арасында қайта қылмыс жасаудың алдын алуға бағытталған профилактикалық шаралар өткізілді. Іс-шараны ҚАЖД Мұнайлы аудандық пробация қызметі ұйымдастырды, – деп хабарлайды Polisia.kz.
Кездесу барысында қатысушыларға заң талаптары мен сот белгілеген міндеттерді сақтау тәртібі түсіндіріліп, құқық бұзған жағдайда жауапкершілік қарастырылатыны ескертілді. Сондай-ақ интернет-алаяқтықтың алдын алу, дроппер ретінде банк карталарын үшінші тұлғаларға берудің заңсыз екені туралы ақпарат берілді.
Мамандардың айтуынша, негізгі мақсат — сотталған азаматтардың құқықтық сауаттылығын арттыру, оларды қоғамға бейімдеу және қайта қылмысқа жол бермеу. Шара соңында қатысушыларға құқықтық және әлеуметтік мәселелер бойынша түсіндіру жұмыстары жүргізілді.
Маңғыстау облысы ҚАЖД өкілдері мұндай жедел-профилактикалық және түсіндіру жұмыстары алдағы уақытта да тұрақты түрде жалғасатынын атап өтті. Олар пробация есебіндегі тұлғалармен жеке жұмыс күшейтіліп, әлеуметтік қызметтер мен жергілікті органдардың өзара іс-қимылы арқылы қайта қылмыстың алдын алу шаралары жүйелі түрде жүргізілетінін жеткізді.
