Маңғыстау облысында "Назар аударыңыз, балалар!" республикалық жедел-профилактикалық іс-шарасы аясында жол қозғалысы ережелерін қатаң сақтап, өзгелерге үлгі бола білген кішкентай тәртіпті азаматтар анықталды, - деп хабарлайды Polisia.kz.
Маңғыстау облысы полиция департаментінің әкімшілік полиция басқармасы қызметкерлері жолда жүру мәдениетін жауапкершілікпен ұстанып, қауіпсіздік талаптарын бұлжытпай орындайтын балаларды алғыс хаттармен марапаттады.
Акция барысында полицейлер мектептер мен балабақшаларда, көше қиылыстары мен жаяу жүргіншілер өткелдерінде рейдтік іс-шаралар жүргізді. Нәтижесінде бағдаршамның жасыл түсін күтіп өтіп, ата-анасының жанынан ажырамай, жолда мұқияттылық танытқан бүлдіршіндер ерекше көзге түсті.
Мамандардың айтуынша, басты мақсат — жазалау емес, ынталандыру. Балалық шақтан қалыптасқан қауіпсіздік мәдениеті — болашақта жол-көлік оқиғаларының алдын алудың маңызды кепілі.
— Мұндай тәртіпті балалар — баршаға үлгі. Қауіпсіздік мәдениеті ерте жастан қалыптасуы тиіс, — деп атап өтті әкімшілік полиция басқармасының өкілі.
Алғыс хат иегерлері тек марапатпен ғана емес, полиция қызметкерлері тарапынан жарық шағылыстырғыш білезіктер мен тәтті сыйлықтарға да ие болды. Сонымен қатар ата-аналарына бала тәрбиесіндегі жауапкершілігі үшін алғыс білдірілді.
"Назар аударыңыз, балалар!" акциясы жаңа оқу жылы қарсаңында балалардың жолдағы қауіпсіздігін қамтамасыз етуге және қоғамда жол мәдениетін қалыптастыруға бағытталған. Іс-шара аясында жүргізушілер мен жаяу жүргіншілерге түсіндіру жұмыстары да күшейтілді.
Жол қауіпсіздігі — бала кезден басталатын маңызды мәдениет.
