"Назар аударыңыз, балалар" ЖПІШ: Қарағанды облысында 300-ден астам құқық бұзушылықтың жолы кесілді
Қарағандыда "Назар аударыңыз, балалар" республикалық жедел-профилактикалық іс-шарасының қорытындысы шығарылды, – деп хабарлайды Polisia.kz.
"Назар аударыңыз, балалар!" кең ауқымды акциясы үш күн бойы өткізілді. Балалардың жол-көлік жарақатының алдын алуға және кәмелетке толмағандардың қауіпсіздігін қамтамасыз етуге бағытталған іс-шара барысында Қарағанды облысының полиция қызметкерлері 308 әкімшілік құқық бұзушылықты анықтады.
Жедел-профилактикалық іс-шараның нәтижелері балалар мен жасөспірімдерге қатысты заңнама талаптарының сақталуында әлі де бірқатар мәселе бар екенін көрсетті.
Ең көп құқық бұзушылық ҚР ӘҚБтК-нің 442-бабының 2-бөлігі бойынша тіркелді (231 дерек). Аталған бап кәмелетке толмағандардың қатысуымен іс-шараларды ұйымдастыру және өткізу кезінде қойылатын талаптарды сақтамауға қатысты. Бұл балалар қатысатын бос уақытты өткізу орындары мен іс-шараларға бақылауды күшейтіп, ықтимал қауіпті жағдайлардың алдын алудың маңыздылығын көрсетеді.
Балаларды тасымалдауға қатысты құқық бұзушылықтар статистикасы да алаңдатады. ҚР ӘҚБтК-нің 593-бабы бойынша 27 әкімшілік құқық бұзушылық анықталды. Оның ішінде автокөліктің алдыңғы орындықтарында балаларды ұстап тұратын арнайы құрылғыларды пайдаланбау фактілері бар.
Жас жолаушылардың қауіпсіздігі – басты басымдықтардың бірі. Қарапайым қауіпсіздік ережелерін елемеу қайғылы жағдайларға әкелуі мүмкін.
Сонымен қатар тыныштықты бұзу, кәмелетке толмағандарға алкоголь өнімдерін заңсыз сату және олардың алкоголь тұтынуы, сондай-ақ жасөспірімдердің түнгі уақытта ойын-сауық орындарында болуы бойынша фактілер тіркелді. Кәмелетке толмағандарға темекі өнімдерін сату және кәмелетке толмағандар жасаған ұсақ бұзақылық фактілері де анықталды.
ЖПІШ аясындағы маңызды бағыттардың бірі – ата-аналардың немесе заңды өкілдердің балаларды тәрбиелеу жөніндегі міндеттерін орындамауының 26 фактісін анықтау болды. Бұл көрсеткіш өскелең ұрпақтың заңға бағынатын мінез-құлқын қалыптастырудағы отбасының рөліне және ата-аналармен профилактикалық жұмысты күшейту қажеттілігіне назар аудартады.
"Назар аударыңыз, балалар!" іс-шарасы қоғамдағы балалардың қауіпсіздігі мен әл-ауқатын қамтамасыз ету міндеттерінің кешенді сипатқа ие екенін тағы бір мәрте көрсетті.
