Павлодар облысы ҚАЖД қызметкерлері оқушыларға кешенді профилактикалық акция өткізді, — деп хабарлайды Polisia.kz.
№63 және №45 мекемелерінің қызметкерлері жасөспірімдер арасында есірткі қылмысының алдын алу және құқықтық сауаттылықты қалыптастыруға бағытталған ауқымды профилактикалық іс-шара ұйымдастырды. Акция №18 және №6 орта мектептердің оқушыларын қамтыды.
Кездесу барысында қылмыстық-атқару жүйесінің өкілдері оқушылармен түсіндіру жұмыстарын жүргізді. Негізгі назар тыйым салынған заттарды қолданудың салдарына ғана емес, оларды таратқаны үшін көзделген қатаң қылмыстық жауапкершілікке де аударылды.
— Біздің мақсатымыз — жастарды тек статистикамен қорқыту емес, олардың бойында есірткіге деген тұрақты теріс көзқарас қалыптастырып, салауатты өмір салты құндылықтарын дәріптеу, — деп атап өтті ҚАЖ қызметкерлері.
Іс-шара барысында жоғары сынып оқушыларына есірткі қылмысы үшін жазасын өтеп жатқан сотталған азаматпен қашықтықтан телемост ұйымдастырылды. Ашық диалог форматында ол өз өміріндегі жіберген қателіктері, орындалмаған армандары, жоғалтқан еркіндігі және “жеңіл табыстың” ауыр салдары туралы шынайы әңгімеледі. Оның өкініші мен өзгелерді өз қателігін қайталамауға шақыруы оқушыларға үлкен әсер қалдырды.
Профилактикалық іс-шарамен қатар, мекеме қызметкерлері мектеп түлектеріне кәсіптік бағдар беру жұмыстарын жүргізді. Оқушыларға ішкі істер органдарындағы қызметтің артықшылықтары таныстырылды.
Оқушыларға:
ІІМ жүйесінің жоғары оқу орындарына түсу тәртібі мен талаптары;
Курсанттар мен қызметкерлерге берілетін әлеуметтік кепілдіктер;
Елдегі құқықтық тәртіпті қамтамасыз ету қызметінің ерекшеліктері түсіндірілді.
Өткізілген іс-шаралар жастар арасында құқықтық сананы қалыптастыру бағытындағы жүйелі жұмыстың маңызды бөлігіне айналды. Мұндай кездесулер қоғам мен құқық қорғау органдары арасындағы байланысты нығайтып, жасөспірімдердің заңға бағынатын саналы болашақты таңдауға ықпал етеді.
