Павлодар қаласының тұрғыны көршісінің жүйелі түрде қорқытып, жанжал шығарғаны туралы полицияға жүгінді. Тәртіп сақшылары жедел әрекет етіп, құқық бұзушыға қатысты қорғау нұсқамасын шығарып, тұрғынның қауіпсіздігін қамтамасыз етті, - деп хабарлайды Polisia.kz.
Полиция қызметкерлерінің кәсіби әрі жедел әрекеті қоғам тыныштығын сақтауда маңызды рөл атқарады. Мұны азаматтардың тәртіп сақшыларына жолдап жатқан алғыс сөздері де айқын дәлелдейді.
Павлодар қаласының тұрғыны көршісінің жүйелі түрде жанжал шығарып, қорқыту сипатындағы әрекеттерге барғаны жөнінде полицияға арызданған. Оның айтуынша, құқыққа қайшы әрекеттерді тоқтату туралы бірнеше мәрте ескерту жасалғанымен, көршісі оған құлақ аспаған.
Оқиға бойынша отбасылық-тұрмыстық зорлық-зомбылыққа қарсы күрес бөлімінің аға инспекторы Бақытжан Тұрсаринова мен учаскелік полиция инспекторы Ерғанат Қакенов қажетті тексеру жұмыстарын жүргізді. Полицейлер куәлардан жауап алып, бейнебақылау камераларының жазбаларын зерделеді. Сонымен қатар құқық бұзушының тұрғылықты жерін анықтау мақсатында қосымша іздестіру іс-шаралары ұйымдастырылды.
Жүргізілген жұмыстардың нәтижесінде қоғамдық тәртіпті бұзған азаматшаға қатысты 30 тәулік мерзімге қорғау нұсқамасы шығарылды.
Көрсетілген көмек үшін тұрғын полиция қызметкерлеріне шынайы ризашылығын білдірді.
– Көмектеріңіз бен жедел әрекет еткендеріңіз үшін зор алғысымды білдіремін! Бүгін маған қорғау нұсқамасының ресми көшірмесі табысталды. Енді отбасымыз жеңіл тыныстап, өзімізді заңның сенімді қорғауында сезіндік. Кәсібиліктеріңізге, адамгершілік қарым-қатынастарыңызға және балаларымды қорғағандарыңызға мың алғыс! Мен тағы бір мәрте полиция қызметкерлерінің сенімді тірек екеніне көз жеткіздім. Баршаңызға қызметтеріңізге табыс тілеймін, – деді қала тұрғыны.
Полиция азаматтарды қорқыту, қудалау немесе өзге де құқыққа қайшы әрекеттерді елемей қалдырмауға және дер кезінде құқық қорғау органдарына жүгінуге шақырады. Уақытылы қабылданған шаралар жанжалдың ушығуына жол бермей, азаматтардың қауіпсіздігін қамтамасыз етуге мүмкіндік береді.
Құқық бұзушылық туралы "102" арнасы арқылы, Police 102 мобильді қосымшасы немесе Павлодар облысы полиция департаментінің ресми Instagram парақшасының Direct қызметі арқылы хабарлауға болады.
