Павлодарлықтар 3 млн теңгеден асатын сомаға қару тапсырды, – деп хабарлайды Polisia.kz.
Қоғамдық қауіпсіздікті қамтамасыз ету және атыс қаруын, оқ-дәрілер мен жарылғыш заттарды пайдалануға байланысты қылмыстардың алдын алу мақсатында Павлодар облысының аумағында халықтан қаруды қабылдап алу жалғасуда. Ерікті түрде тапсырылған қару үшін сыйақы төленеді.
3 мамырға дейін полицияға қаруды өз еркімен тапсыру туралы ниет білдірген азаматтардан 30 өтініш келіп түсті. Тұрғындар 21 бірлік тегіс ұңғылы, 9 бірлік ұзын ұңғылы ойық қаруды және ойық ұңғылы қарудың 3260 патронын тапсырды.
– Павлодар қаласының тұрғыны 5,6 мм калибрлі «ТОЗ-8м» аңшылық карабинін өз еркімен тапсырды, төлем сомасы 111 мың теңгеден асты. Баянауыл ауданының тұрғыны ерікті негізде 16 калибрлі үш ұңғылы аңшылық қаруды тапсырды, төлемнің болжамды сомасы – 66 780 теңге. Барлық ерікті қару баллистикалық зерттеуге бағытталған. Қару шамамен 3 млн астам сомаға тапсырылды, – деп хабарлады Павлодар облысы ПД Әкімшілік полиция басқармасының бастығы Борис Әлімбаев.
