Түркістан облысында мас тұрғын полицейдің заңды талаптарына бағынбағыны үшін жауапқа тартылды, – деп хабарлайды Polisia.kz.
Кентау қалалық полиция бөлімшесінің полицейлері қала бойынша қоғамдық тәртіптің сақталуын қадағалап, түрлі қылмыстардың алдын алу бағытында қызмет атқарып келеді.
Полиция бөлімінің «102» нөміріне жергілікті тұрғыннан белгісіз біреу үйінің алдында ішімдік ішіп отырғаны жөнінде хабарлама келіп түсті.
Оқиға орнына Кентау ҚПБ ЖПҚ полицей Жандос Қалдыкөзов жетіп, өз қызметін атқармақ болады. Бірақ тұрғын заңды талаптарға бағынбай, дөрекі мінезін көрсете бастайды. Билік өкіліне өз қызметтік міндеттерін атқару барысында тіл тигізіп, балағат сөздермен қорлап, аузына келгенін айтады.
Одан бөлек, медициналық қорытындыға сәйкес орташа дәрежеде мас күйде екендігі анықталды.
Тәртіп бұзушының іс-әрекеті ҚР Қылмыстық кодексінің 378-бабының 1-бөлігінде көрсетілген (билік өкілін қорлау) бойынша тіркеліп, қылмыстық теріс қылықпен сотқа жолданды.
Түркістан облысының полицейлері тұрғындарға қоғамдық орында тәртіпті бұзбауға кеңес береді.
