Полицейлер пошта арқылы жіберілген синтетикалық есірткіні тапты, – деп хабарлайды Polisia.kz.
Бұған дейін хабарланғандай, көлік полициясы қызметкерлері қаңтар айында жалға алынған пәтерде синтетикалық есірткі шығарумен және оны таратумен айналысқан ақтөбелікті ұстаған болатын. Сол кезде көлік полицейлері заңсыз айналымнан бір келіге жуық “Альфа-PVP” синтетикалық есірткісін тәркіледі. Аталған факті бойынша күдіктіге қатысты “қамауда ұстау” түріндегі бұлтартпау шарасы таңдалды.
Ер адам тергеу изоляторына тоғытылғанына қарамастан, көлік полициясы жедел іс-шараларды жүргізуді жалғастырып, шетелден ұсталғанның атына келіп түскен пошта сәлемдемесін анықтады. Оның ішінен бір келі синтетикалық есірткі (скорость) табылды.
Аталған факті бойынша Қазақстан Республикасы Қылмыстық кодексінің 297-бабы “Есірткі құралдарын, психотроптық заттарды, сол тектестерді өткізу мақсатында заңсыз дайындау, қайта өңдеу, сатып алу, сақтау, тасымалдау, жөнелту не өткізу” бойынша сотқа дейінгі іс жүргізу басталды.
Қылмыстық іс шеңберінде көршілес елдердің ішкі істер органдарының қолдау көрсетуімен сәлемдемені жөнелтуші мен басқа да адамдарды анықтау бойынша шаралар қабылданатын болады.
