Ақтөбе облысында полиция бөлімдеріне 200-ден астам кәмелетке толмаған бала жеткізілді, – деп хабарлайды Polisia.kz.
Жасөспірімдер қылмысының алдын алу, кәмелетке толмағандардың заңды өкілдерінің еріп жүруінсіз түнгі уақытта ойын-сауық мекемелерінде және тұрғын үйден тыс жерде болу, сондай-ақ кәмелетке толмағандарға алкогольдік ішімдіктерді, темекі бұйымдарын өткізу фактілерінің жолын кесу мақсатында 24-27 наурыз аралығында облыс аумағында «Жасөспірім» жедел-профилактикалық іс-шарасы өткізілді.
Жоспарланған іс-шараларды іске асыру барысында ювеналды полиция инспекторлары аулаларда, саябақтарда және жастар көп жиналатын орындарда, ойын-сауық орындарында рейдтік іс-шаралар ұйымдастыруда.
Нәтижесінде полиция бөлімдеріне 204 кәмелетке толмаған бала жеткізілді, 200 жасөспірім сағат 23.00-ден 06.00-ге дейін заңды өкілдерінің еріп жүруінсіз тұрғын үйден тыс жерде болған, 9 ата-ана кәмелетке толмаған балаларды тәрбиелеу жөніндегі міндеттерін орындамағаны үшін әкімшілік жауапкершілікке тартылды.
Полиция есебіне 53 жасөспірім және 37 қолайсыз отбасы қойылды.
