Полиция павлодарлық велосипедшілерді қырағылық танытуға шақырады, - деп хабарлайды Polisia.kz.
Көктем мезгілінің келуімен веломаусым басталып, кеш күзге дейін жалғасады. Бұл қалада велосипед тебудің кеңінен таралғанын аңғартады.
Өкінішке қарай, көптеген велосипед иелері өз мүлкінен айырылып жатады. Мұндай жағдайлардың орын алуына көбіне велосипед иелерінің өздері де себеп болады: олар көліктерін қараусыз қалдырады, сенімді қорғаныс құралдарымен жабдықтамайды, көшелерде немесе тұрғын үйлердің кіреберістерінде қалдырады, сондай-ақ оларды үйге немесе құлыпталатын тамбурларға кіргізу мүмкіндігін ескермейді.
Павлодар облысы полиция департаментінің мәліметінше, 2025 жылы өңірде велосипед ұрлығының 150 дерегі тіркелсе, биылғы жылы 2 дерек орын алған.
Велосипед ұрлығының алдын алу мақсатында полицейлер тұрғындарға жеке мүлкін қорғаудың негізгі қағидаларын қатаң сақтауды ұсынады:
велосипедті қараусыз қалдырмау;
оны тұрғын үйлердің кіреберістерінде де, дүкендер мен сауда орталықтарының жанында да бақылаусыз тастамау;
бейтаныс адамдардан велосипед сатып алмау, тіпті бағасы арзан болып көрінсе де;
велосипедтерді тек арнайы спорт дүкендерінен сатып алу.
Мамандардың айтуынша, ресми сауда орындары көлік құралына қатысты тиісті құжаттарды ұсынады. Бұл құжаттар сатып алу-сату фактісін ғана емес, мәміленің заңдылығын да растайды.
