Жетісу облысында полицейлер жол жиегінде адасып жүрген баланы ата-анасына табыстады, - деп хабарлайды Polisia.kz.
Кейде полиция қызметкерлерінің ең маңызды міндеті - күрделі операцияларда емес, қарапайым, бірақ аса жауапты сәттерде көрініс табады. Мұндай жағдайда кәсібилікпен қатар адамгершілік пен сергектік ерекше мәнге ие.
Кезекті патрульдеу барысында "Беркут 161" экипажының қызметкерлері жол жиегінде жалғыз жүрген шамамен екі жасар бүлдіршінді байқап қалады. Анықталғандай, бала үйден үлкендердің қарауынсыз шығып кеткен, ал ата-анасы оның жоғалғанын тек бірнеше минуттан кейін ғана аңғарған.
Тәртіп сақшылары жағдайға жедел әрекет етіп, бүлдіршінді қауіпсіз жерге алып, оны өз бақылауларына алады. Осы уақытта "102" арнасына аталған оқиға бойынша ешқандай хабарлама тіркелмеген.
Көп ұзамай баланың ата-анасы оқиға орнына келіп жетті. Қауышу сәті жүрекке жылу ұялатарлық әсер қалдырды. Полицейлердің қырағылығы мен жедел қимылының арқасында бала дін аман, қауіпсіз жағдайда болды.
Аталған оқиға - балаларға деген жауапкершілік пен ұдайы бақылаудың маңызын тағы бір мәрте айқындайды. Ал полиция қызметкерлері үшін бұл - күнделікті қызметтің ажырамас бөлігі. Себебі олардың жұмысында ұсақ-түйек деген болмайды.
- Біздің міндетіміз - дер кезінде қасында болып, қолдау көрсету. Кейде қарапайым назардың өзі үлкен қауіптің алдын алады, - дейді полиция қызметкерлері.
