Қарағанды полициясы Нұр-Сұлтанда автокөлікті заңсыз айдап кеткен ұрыны ұстады, – деп хабарлайды Polisia.kz.
11 қыркүйекте Қарағанды облысы ПД патрульдік полиция батальонының отряды Алматы-Екатеринбург тас жолының Теміртау қаласының маңындағы учаскелерінің бірінде қызмет етті. Сағат 15:00 шамасында Нұр-Сұлтанда “Lexus” көлігі ұрланып, ол Қарағанды бағытында жүріп келе жатқаны туралы шұғыл хабарлама түсті.
Сағат 16:20 шамасында полицейлер ұрланған көлікті байқап қалып, ұстады. Жүргізуші көлік ұрлағаны үшін бірнеше рет сотталған 37 жастағы ер адам болған. Ұсталған адамның алкогольдік мас күйде болғаны, медициналық тексерумен расталды. Полиция 2019 жылы бұл азаматтың мас күйінде көлік басқаруы құқығынан айырылғанын анықтады.
Ұсталған адам қосымша тергеу үшін Қарағанды облысы Теміртау қаласының ПБ Ескіқалалық полиция бөліміне берілді.
ҚР Қылмыстық кодексінің 346-бабы (Көлік құралын мас күйінде басқару құқығынан айырылған адамның көлік құралын басқаруы) бойынша қылмыстық іс қозғалды. Қазір тергеу жүріп жатыр.
