Қарағанды және Ұлытау облыстары бойынша ҚАЖД мекемесіне тыйым салынған затты өткізудің жолы кесілді, - деп хабарлайды Polisia.kz.
Қарағанды облысы және Ұлытау облысы бойынша ҚАЖ департаментінің №33 мекемесінде қызметкерлер сотталған адамға тыйым салынған затты беруге жасалған әрекеттің жолын кесті. Ұялы телефон мекемеге келіп түскен бандерольді тексеру барысында анықталды.
2026 жылғы 31 тамызда сәлемдемелер мен бандерольдерді беру бөлмесінде мекеме қызметкерлері Ұлттық ұланның әскери қызметшілерімен бірлесіп, пошта жөнелтілімін тексеру кезінде телефонды, зарядтау құрылғысын және SIM-карталарды анықтады.
Тыйым салынған заттар бандерольдің ішіндегі кәмпит қаптамасына мұқият жасырылған. Бұл ұялы телефонды мекеме аумағына жасырын түрде өткізуге әрекет жасалғанын көрсетеді.
Бандероль мекемеде жазасын өтеп жатқан сотталғандардың бірінің атына жолданған. Тексеру барысында тыйым салынған заттар анықталып, тәркіленді.
Аталған факті белгіленген тәртіппен тіркеліп, материалдар одан әрі қарау және заңнамаға сәйкес процессуалдық шешім қабылдау үшін аумақтық полиция бөліміне жолданды.
Қылмыстық-атқару жүйесі мекемелерінің қызметкерлері тыйым салынған заттардың мекеме аумағына түсуіне жол бермеуге бағытталған кешенді іс-шараларды тұрақты түрде жүргізеді. Бұл ретте сотталғандардың атына келіп түсетін сәлемдемелер мен бандерольдерді мұқият тексеруге ерекше назар аударылады.
Қызметкерлердің қырағылығы мен кәсіби жұмысының нәтижесінде тыйым салынған затты өткізуге жасалған кезекті әрекеттің жолы дер кезінде кесілді.
