Қызылорда облыстық ҚАЖД мекемесінде “Жырлайды жүрек” атты әдеби-сазды кеш өткізілді, – деп хабарлайды Polisia.kz.
Қызылорда облысы бойынша ҚАЖ департаментінің №37 мекемесінде жазасын өтеушілерге қазақтың ақиық ақыны Мұқағали Мақатаевтың 93 жылдығына арналған “Жырлайды жүрек” атты әдеби кеш өтті. Әдеби кешті Шиелі аудандық жалпы орта білім беретін кешкі мектептің мұғалімдері ұйымдастырды. Әдеби кешті кешкі мектеп директорының оқу-ісі жөніндегі орынбасары Ә.Байтілеуова ашып, ақын өміріне, шығармашылығына тоқталып өтті.
Кеште сотталған азаматтар Мұқағали әлеміне тереңірек бойлап, оның сыршыл поэзиясын, жебелі жырларынан өлеңдер оқыды. Ақынның өмірі мен шығармашылығынан бейнесюжеттер көрсетіліп, Мұқағали ақынның өз дауысымен оқыған бірқатар өлеңдері ұсынылды. Сотталған азаматтар да ақынның “Апырмай, туған жер-ай”, “Ғашықпын!”, “Дос болам десең”, “Әке” өлеңдерін жатқа айтты. Әдеби кеш соңын ақыннның сөзіне жазылған “Саржайлау” әнімен аяқтады.
– Мұқағали – қазақ поэзиясының символына айналған ұлы ақын. Поэзияның адам жанын жақсылыққа, ізгілікке, сұлулыққа тәрбиелейтін қасиеті бар. Біздің әрқайсымыз мектеп қабырғасынан ақын өлеңдерімен сусындап өстік. Ақын жырлары – әр адамға күш-қайрат, рух беретін өзгеше бір әлем, – деді сотталған азамат.
