Шахтинск қаласында ұрланған техниканы тасымалдайтын ұрылар қолға түсті, – деп хабарлайды Polisia.kz.
9 қазанда Қарағанды облысының Шахтинск қаласындағы патрульдік полиция взводының отряды қала ішінде кезекшілікке шықты. Түн ортасында полицейлер 41 жастағы ер адам басқарған ауыр жүк көлігін Индустриальная көшесіндегі үйдің қасында тоқтатты. Сондай-ақ, оның жанында жолаушылар орындығында 40 жастағы жолаушы болған.
Бұл көлікті тексеру кезінде полицейлер үш қозғалтқышты, ағаш кесетін құралды және станокты тапты. Ұсталғандар бұл техниканың кәсіпорындардың бірінен ұрланғанын мойындады.
ҚР ҚК 188-бабы (Ұрлық) бойынша қылмыстық іс қозғалды. Қазіргі уақытта тергеу жүргізілуде. Полиция келтірілген материалдық шығын мөлшерін анықтауда.
