Шымкент қаласы Полиция департаменті музейінде сұрапыл соғыс (1941-1945ж.) жылдарынан хабар беретін экспозиция орнатылған, - деп хабарлайды Polisia.kz.
Ел басына күн туғанда жерін жаудан азат етуге асығып аттанған жергілікті азаматтардың аман-есен оралғандарының бірқатары милиция бөлімшелеріне жұмысқа орналасты. Олардың есімдері ешқашан ұмытылмайды.
Сайдакбар Сатыбалдиев 1918 жылдың 15 мамырда ОҚО Сайрам селосында дүниеге келген. 1940 жылы сегіз жылдық мектепті бітіріп, наубайханаға жұмысқа орналасады. 1941 жылы қызыл әскер қатарына шақырылып, Мәскеуден Берлинге дейінгі шайқастарда болып, 1945 жылдың қыркүйегінде жеңіспен елге оралады.
Екінші дәрежелі Даңқ, Ұлы Отан соғысы, Еңбек Қызыл Ту ордендерімен және көптеген соғыс және еңбек медальдарымен марапатталған.1946 жылы қаңтар айынан бастап Шымкент қ. Ішкі істер органдары қатарына еніп, мемлекеттік автоинспекцияда жолда жүру бағыттарды реттеуші қызметін атқарған. Сайдакбар Сатыбалдиев өзінің қызметіне аса үлкен жауапкершілікпен қарайтын. Бұл кісінің қаланың орталық көшесіндегі жұмыс орнына кейбір қала жұрты әдейілеп барып тамсанып қарайтын болған. Әрине, жол-реттеуші милиция старшинасы С.Сатыбалдиевтің қаланың үлкен қиылысындағы тіп-тіке тұрып, алатаяғымен мәнерлеп, тек қолдарымен би-билеп тұрғандай, автокөліктердің бағытын реттегенде қызығып қарамауға болмайтын еді. Халықтың сүйіспеншілігіне ие болған, еңбегі еленген Сейдакбар Сатыбалдиевке 2004 жылы ТМД елдерінде тұңғыш рет Шымкент қаласындағы Жол автоинспекция ғимаратының алдына қоладан құйылған ескерткіш орнатылған.
