Солтүстік Қазақстан облысы полиция департаментінің профилактикалық жұмысты үйлестіру басқармасының қызметкерлері Төтенше жағдайлар департаментінің мамандарымен бірлесіп, ведомствоаралық форматта "Қауіпсіз жаз" профилактикалық акциясын өткізді, - деп хабарлайды Polisia.kz.
Акция қоғамдық көлікте ұйымдастырылды. Полицейлер мен құтқарушылар жолаушыларға арнайы жадынамалар таратып, жаз мезгілінде балалардың қауіпсіздігін қамтамасыз етуге бағытталған негізгі қағидаларды түсіндірді. Әсіресе балалардың терезеден құлап кетуінің алдын алу және су айдындарындағы қауіпсіздік мәселелеріне ерекше назар аударылды.
Іс-шара барысында мамандар масаға қарсы орнатылатын торлардың балаларды құлаудан қорғамайтынын еске салып, терезелерді арнайы қорғаныс құрылғыларымен немесе ашылуын шектейтін тетіктермен жабдықтауға кеңес берді. Сонымен қатар ата-аналарға балаларды ашық терезенің жанында қараусыз қалдырмаудың маңыздылығы түсіндірілді.
Сондай-ақ акция барысында су айдындарында қауіпсіз демалу қағидалары да кеңінен насихатталды. Азаматтарға тек арнайы жабдықталған жағажайларда шомылу, балаларды су жағасында бір сәтке де қараусыз қалдырмау және қайықпен немесе өзге де жүзу құралдарымен жүрген кезде міндетті түрде құтқару кеудешелерін пайдалану қажеттігі ескертілді.
Полицейлер балалардың қауіпсіздігі ең алдымен ересектердің жауапкершілігі мен қырағылығына байланысты екенін атап өтті. Олардың айтуынша, қарапайым қауіпсіздік талаптарын сақтау көптеген қайғылы оқиғалардың алдын алып, балалардың өмірі мен денсаулығын сақтауға мүмкіндік береді.
