Талдықорғанда PlayStation ойын приставкаларының ұрлығы ашылды, - деп хабарлайды Polisia.kz.
Талдықорған қаласында ерекше қылмыс тіркелді. Сенімді ақтамаған азамат өз туысының қызметтік жағдайын пайдаланып, ойын приставкалары мен жабдықтарын қолды қылған.
Оқиға ойын-сауық залында болған. Бұл мекемеде күдіктінің туысы әкімшілік қызмет атқарған. Ғимараттың жабылу сәтін мұқият бақылап, ішкі тәртіпті зерттеген қаскүнем біраз уақыттан соң оңтайлы сәтті пайдаланып, қылмыстық жоспарын жүзеге асырған.
Ұрлық барысында ол жеті Sony PlayStation 4 ойын приставкасы мен он екі джойстикті жымқырып, иесіне айтарлықтай шығын келтірген. Алайда полиция қызметкерлерінің жедел әрекетінің арқасында күдікті көп ұзамай қолға түсті. Ол 21 жастағы жергілікті тұрғын болып шықты. Қазіргі уақытта күдікті қамауға алынып, тергеу амалдары жүргізілуде. Ұрланған мүлік заңды иесіне қайтарылды.
Полиция азаматтарға өз мүліктерінің қауіпсіздігіне мұқият болуды ескертеді. Құқық бұзушылықтың салдары ауыр екенін ұмытпаңыздар: адал еңбекпен тапқан дүние ғана баянды болмақ.