Таразда жалған полицей ұсталды, – деп хабарлайды Polisia.kz.
Құқық бұзушы 30 мамырда ұсталды. Тұрар Рысқұлов атындағы саябақтың аумағын патрульдеу кезінде Тараз қаласының Полиция басқармасы бірінші полиция бөлімінің қызметкерлері полиция формасындағы күдікті жас жігітті байқады. Саябақта серуендеп жүрген жігіт полиция қызметкерлерін көріп, есеңгіреп қалған.
Тексеру барысында тәртіп сақшылары жалған полицейдің 19 жаста екенін және оның Түркістан облысының тұрғыны екенін анықтады. Ұсталған азаматтың осындай қылмысы үшін 2022 жылдың сәуір айында Шымкент қаласында сотты болғаны белгілі болды. Ол кезде жас жігіт ТЖД қызметкерінің нысанды киімін киген екен. Оның мұндай қадамға қандай мақсатпен барғанын тергеу анықтайтын болады.
Аталған дерекке қатысты ҚР ҚК-нің 390-бабының 1-бөлімі бойынша сотқа дейінгі тергеу амалдары басталды. Осы баптың санкциясы сексен айлық есептік көрсеткішке дейінгі мөлшерде айыппұл салу немесе сол мөлшерде түзеу жұмыстары немесе сексен сағатқа дейінгі мерзімге қоғамдық жұмыстарға тарту яки жиырма тәулікке дейінгі мерзімге қамау түріндегі жазаны көздейді.
