Туған жерге қызмет ету – елге деген сүйіспеншіліктің нақты көрінісі. Өзі туып-өскен ауылдың өркендеуіне үлес қосып, өскелең ұрпақтың тәрбиесіне күш-жігерін арнаған азаматтардың еңбегі қашанда құрметке лайық. Осындай азаматтардың бірі – Атырау облысы полиция департаменті жылдам қимылдайтын арнайы жасағының взвод командирі Азамат Кәштенбай. Толығырақ Polisia.kz сайтынан оқыңыздар.
Құқық қорғау саласындағы жауапты қызметін абыроймен атқарып жүрген ол бос уақытын туған жері – Қызылбалық ауылдық округіндегі балалар мен жасөспірімдерді спортқа баулуға арнайды.
Азамат Кәштенбай інісі Мерей Кәштенбаймен бірге 2014 жылы ауылда "Кәштенбай" спорт клубын ашқан. Бүгінде мұнда 70-ке жуық бала тұрақты түрде жаттығады. Клубқа полиция қызметкерлері де қатысып, спортпен шұғылданады.
Ауыл балаларына спортпен айналысуға мүмкіндік беру мақсатында ашылған клуб бүгінде жас спортшылардың шеберлігін шыңдайтын орталыққа айналды. Оның шәкірттері облыстық және республикалық жарыстарда ғана емес, Азия және Еуропа чемпионаттарында да жүлделі орындарға ие болып, туған ауылдың абыройын асқақтатып жүр.
Азамат Кәштенбайдың өзі де бала кезінен спортпен айналысып өскен. Кейін алған тәлім-тәрбиесі мен жинақтаған тәжірибесін жас ұрпаққа үйретуді мақсат еткен. Оның пайымынша, спорт – тек жарыс пен жеңістің жолы емес, сонымен қатар баланы тәртіпке, жауапкершілікке, төзімділікке, еңбекқорлыққа және мақсатқа ұмтылуға баулитын үлкен мектеп.
Күнделікті қызметінде қоғамдық тәртіп пен азаматтардың қауіпсіздігін қамтамасыз ететін полиция капитаны жұмыстан тыс уақытта ауыл жастарының тәрбиесіне де көңіл бөледі. Ол шәкірттеріне спорттық әдіс-тәсілдерді үйретіп қана қоймай, үлкенді сыйлау, кішіге қамқор болу, елге адал қызмет ету секілді адамгершілік құндылықтарды бойына сіңіруге күш салады.
"Кәштенбай" спорт клубының жетістігі – туған жерге жанашырлықпен жасалған игі істің нәтижесі. Бір кездері Қызылбалық ауылында спортқа қызығып өскен бала бүгінде сол ауылда чемпиондар буынын тәрбиелеп келеді.
Азамат Кәштенбай үшін басты мақсат – жеңіс тұғырынан көрінетін спортшыларды ғана емес, тәртіпті, қайсар, жауапкершілігі мол, елінің дамуына үлес қосуға дайын азаматтарды тәрбиелеу.
Туған жерге қызмет ету – үлкен сөзден емес, нақты істерден көрінеді. Азамат Кәштенбайдың еңбегі – соның айқын дәлелі. Өйткені ауылдың болашағы – оның жастары. Ал сол жастардың білімді, дені сау, тәртіпті әрі отаншыл болып қалыптасуына үлес қосу – туған жерге жасалған ең үлкен қызметтің бірі.
