Түркістандық оқушылар Полиция департаментінің бастығымен бірге экскурсия жасады, – деп хабарлайды Polisia.kz.
ҚР Президенті Қ. Тоқаевтың 2022 жылды “Балалар жылы” деп жариялауы аясында және ҚР Ішкі істер министрі Марат Ахметжановтың бастамасымен “Мен және менің полицейім” акциясы бойынша Түркістан облысының полицейлері облыс орталығының оқушылары үшін қызық экскурсия ұйымдастырды.
Оқушыларды облыстың бас полицейі Мұрат Қабденов қарсы алып, полиция қызметі туралы айтып берді. Бірінші кезекте балаларға Жедел басқару орталығы көрсетілді, онда оқушылар көшелердің қауіпсіздігі мен қоғамдық тәртіпті қадағалау бойынша тәулік бойы бейнебақылау жүргізілетінімен танысты.
М. Қабденов оқушыларға полицейлер нақты уақыт режимінде көшелер мен жолдардағы жағдайды бейнекамералардың көмегімен қалай бақылап отырғанын, жедел міндеттерді шешу үшін полиция нарядтарын қалай басқаратынын және қылмыстарды қалай “ізін суытпай” ашатынын айтты.
Сондай-ақ, тәртіп сақшылары оқушыларға бейнебақылау камераларын “басқару тетігі” арқылы басқару мен бейнекамералардың қаншалықты деңгейде ЖБО-ға қосылғанын, күнделікті оқушылардың өзі оқитын мектептерін полицейлер камера арқылы бақылап отыратын көрсетті.
Тіпті таңданыстарын жасырмай, бас полицейге салаға қатысты сұрақтарын жаудырды. Өз кезегінде облыстың ПД басшысы полициядағы жұмысқа, құқық бұзушылықтардың қалай анықталатынына және қызметтің перспективаларына қатысты сұрақтарға жауап берді.
Сонымен қатар, оқушыларға полицей мамандығының қыр-сырын айтып, өз жұмысының қызықты жағдайларымен бөлісті.
– Балалар сендерге ата-аналарың мен мына еліміз үлкен үміт артып отыр. Себебі жасалып жатқан жағдайдың барлығы сендердің жарқын болашақтарың үшін. Сендер тәртіпті болып, сабақты жақсы оқысаңдар, келешекте нағыз майталман маман боласыңдар. “Білекті бірді жығады, білімді мыңды жығады” демекші қажетті білім алсаңдар, сендердің арман, мақсаттарың да тез орындалады. Полицей болу үшін де бірінші кезекте өзіңді тәрбиелеуің керек. Жан-жағыңа, достарыңа үлгі-өнеге болып, әрқашан достыққа адал, ұқыпты да шыншыл болуларың қажет. Полиция сендердің тыныш ұйқыларың үшін күндіз-түні қызметте, – деді Мұрат Қабденов.
Бұдан әрі полиция қызметкерлері оқушыларға мобильді байланыс кешенінің жұмысын көрсетті, рухани астананың көрікті жерлерін аралайтын тұрғындар мен туристерге жедел түрде байланысқа шығу үшін жасалған 102 пультіне қоңырау шала алатынын, ең белсенді жерлерде орналасқан SOS кнопкасын көрді. Батырма арқылы полицейлермен байланысқа шығып, ерекше әсер алды.
Сондай-ақ, оқушылар мобильді стационарлық полиция бекетіне және Түркістан қаласы полиция басқармасының уақытша ұстау изоляторына барды. Себебі балалардың арасында арнайы есепке қойылған жоғары сынып оқушылары да бар.
Ер балаларға УҰИ-да қылмыс жасаған азаматтардың отыратын орны көрсетіліп, полицейлердің түсіндірмелері тыңдалды. Соңында оқушылар экскурсияның танымды болғанын және қиын әрі өте маңызды мамандыққа жаңаша қарауға мүмкіндік бергенін атап өтті.
Түркістан облысы ПД бастығы Мұрат Қабденов жас буынға мықты денсаулық пен оқуда табыс тілеп, естелікке суретке түсті.
