Қостанай облысында учаскелік инспектор газға уланып қалған ер адамды құтқарып қалды, - деп хабарлайды Polisia.kz.
Сәуірдің салқын кештерінің бірінде Фурманов ауылында адам өміріне қауіп төндірген тосын жағдай болды. Көмірқышқыл газынан уланған 54 жастағы ер адам ауыр халге түсті. Бала кезінен II топтағы мүгедектігі бар азамат үшін бұл сәт тағдыр таразысына түскен сын сағатына айналды.
Осындай күрделі мезетте учаскелік полиция инспекторы Дархан Турғановтың жедел әрі батыл әрекеті шешуші рөл атқарды. Уақытты жоғалтпай, дер кезінде көрсетілген көмек нәтижесінде азаматтың өмірі сақталып қалды. Кейін ол Арқалық өңірлік ауруханасына жеткізіліп, дәрігерлердің бақылауына алынды.
Оқиға куәгерлерінің айтуынша, дәл сол сәтте полицейдің кәсібилігі мен шапшаңдығы үміт сәулесін жаққан.
— Егер көмек сәл кешіккенде, бәрі басқаша аяқталуы мүмкін еді. Біз учаскелік инспекторымызға шын жүректен алғыс айтамыз, — дейді ауыл тұрғыны.
Ал Дархан Турғанов бұл әрекетін ерлік деп санамайды. Оның айтуынша, адам өмірі таразыға түскен сәтте әрбір секунд қымбат.
— Ең бастысы — уақытты жоғалтпай, дер кезінде әрекет ету. Адам өмірі — ең қымбат құндылық, — дейді полиция майоры.
Дархан Турғанов ішкі істер органдарында 2012 жылдан бері қызмет етіп келеді. Ал учаскелік инспектор лауазымын 2013 жылдан бері абыроймен атқарып жүр. Бұған дейін де оның батылдығы мен жанқиярлығы жоғары бағаланып, боран кезінде адам өмірін құтқарғаны үшін Қазақстан Республикасы Президентінің Жарлығымен "Ерлігі үшін" медалімен марапатталған.
Бұл жолы да оның кәсіби біліктілігі мен батыл қадамы ықтимал қайғылы жағдайдың алдын алып, тағы бір жанның өмірін сақтап қалды.
Алдын ала мәліметтерге сәйкес, оқиғаға қатты отынмен жұмыс істейтін жылыту пешінің ақаулығы себеп болған. Осыған байланысты полиция қызметкерлері тұрғындарды жылыту жүйелерінің жағдайына бейжай қарамауға, оларды уақтылы тексеріп отыруға және кез келген ақау анықталған жағдайда тиісті мамандарға жүгінуге шақырады.
