Жамбыл облысында шағын футболдан турнир өтті, — деп хабарлайды Polisia.kz.
“ARLAN” спорт кешенінде ішкі істер органдары қызметкерлері арасында Жамбыл облысы полиция департаментінің ауыспалы кубогы үшін дәстүрлі шағын футбол турнирі өтті.
Жарысқа департаменттің түрлі бөліністерінен құралған 20 команда құрамындағы 180 полиция қызметкері қатысты. Турнирдің ерекше сәнін ішкі істер органдарының ардагерлері келтіріп, олар қолданыстағы қызметкерлермен бірге спорттық рухты, командалық бірлікті және қызметке деген адалдықты паш етті.
Турнирдің салтанатты ашылу рәсімінде Жамбыл облысы полиция департаментінің бастығы Қайсар Сұлтанбаев мұндай спорттық іс-шаралардың салауатты өмір салтын насихаттауға, ұжымдық бірлікті нығайтуға және полиция қызметкерлері арасындағы командалық өзара іс-қимылды дамытуға ықпал ететінін атап өтті.
Турнир барысында командалар жоғары дайындық деңгейін, тартысты әрі тартымды ойын өрнегін көрсетті. Ал жанкүйерлер қатысушыларға белсенді қолдау білдіріп, нағыз спорт мерекесінің атмосферасын қалыптастырды.
Жарыс қорытындысы бойынша Жамбыл облысының полиция департаменті Жедел қимылдайтын арнайы жасақтың командасы турнир жеңімпазы атанып, ауыспалы кубокты иеленді. Екінші орынды Сарысу аудандық полиция бөлімінің командасы жеңіп алды. Ал үшінші орын Тараз қаласы полиция басқармасы Жібек жолы полиция бөлімінің командасына бұйырды.
Жеңімпаздар мен жүлдегерлер кубоктармен, медальдармен және дипломдармен марапатталды. Осындай спорттық жарыстарды өткізу ішкі істер органдары қызметкерлері арасындағы қызметтік достықты нығайтып, алдыңғы және кейінгі буын сабақтастығын сақтауға және дене шынықтыру мен спортты дамытуға ықпал ететін игі дәстүрге айналды.
