Жетісу облысында оқушылардың құқықтық сауаттылығы артты, - деп хабарлайды Polisia.kz.
Жетісу облысында өскелең ұрпақтың құқықтық мәдениетін қалыптастыруға бағытталған маңызды іс-шара ұйымдастырылды. Талдықорған қаласындағы №28 мектепте заң негіздері, қоғамдық тәртіп және жол қозғалысы ережелері бойынша онлайн-тестілеу өткізілді.
Оқушылар заманауи форматтағы тексеруге арнайы QR-код арқылы қатысып, өз білімдерін сынады. Бұл әдіс бір мезетте көп оқушыны қамтуға мүмкіндік беріп қана қоймай, оқу үдерісін қолжетімді әрі қызықты етуге жол ашты.
Іс-шара барысында қоғамдық қауіпсіздік басқармасы бастығының орынбасары Аида Бельгибаева оқушыларға құқықтық тәрбие берудің маңыздылығына тоқталды. Ол өз сөзінде заңды сақтау – тек міндет емес, сонымен қатар қауіпсіз әрі тәртіпті қоғамның берік негізі екенін атап өтті.
Тестілеуден кейін оқушылармен профилактикалық түсіндіру жұмыстары жүргізілді. Полиция қызметкерлері заң талаптарын жан-жақты түсіндіріп, жиі кездесетін құқық бұзушылық түрлеріне тоқталып, оқушылардың сұрақтарына жауап берді. Ашық форматтағы мұндай кездесу жасөспірімдердің құқықтық сауаттылығын арттырып, өз әрекеттеріне жауапкершілікпен қарау дағдысын қалыптастыруға ықпал етті.
- Тәртіп мектеп партасынан басталады. Дәл осы ортада заңды түсіну, қоғамға құрметпен қарау және әрбір іс-әрекет үшін жауапкершілік сезімі қалыптасады, – деді Аида Бельгибаева.
Өткізілген іс-шара тек білім деңгейін бағалау ғана емес, сонымен қатар құқықтық мәдениеті жоғары, заңға бағынатын жас ұрпақты тәрбиелеуге бағытталған жүйелі жұмыстың маңызды бөлігі болып табылады.
