Қызылордада үй алдынан жоғалып кеткен жасөспірімдерді полиция қызметкерлері тауып алды, – деп хабарлайды Polisia.kz.
19 сәуірде сағат 14:00 шамасында Жалағаш ауданының Таң ауылында 7-8 жастағы балалар ойнап келеміз деп үйден шығып кетіп, қайта оралмаған. Полицияға арыз олардың ата-анасынан түсті.
Балалардың әке-шешесі бастапқы уақытта өздері іздеп көрген. Таба алмаған соң Жалағаш ауданының полиция бөліміне қарасты жергілікті полиция қызметі бөлімшесінің учаскелік полиция инспекторы Нұрбек Сариевке хабар берген.
Содан учаскелік полиция инспекторы “102”-ге қоңырау шалған.
Жалағаш ауданы Полиция бөлімінің қызметкерлері жоғалған балаларды түні бойы іздеп, түнгі сағат 03:00 шамасында Таң ауылынан шығысқа қарай 7 шақырым жерде орналасқан “Шіркейлі” каналының тұсында орналасқан шабындық жанында ұйықтап жатқан жерінен табады. Бабаларды іздестіруге ауыл тұрғыны Ахметов Төремұратта атсалысып, көмектесті. Полицейлер оларды ата-аналарына аман-есен тапсырды.
Төтенше жағдай кезіндегі карантин режимінің талаптарын сақтамағаны үшін екі баланың ата-анасына ҚР ӘҚБтК-нің 476-бабының 6-бөлігімен әкімшілік хаттамалар толтырылып, жинақталған құжаттар аудандық сотқа жолданды.
Сонымен қатар ата-аналар мен балаларға алдағы уақытта мұндай келеңсіз жағдай орын алмас үшін профилактикалық түсіндірме жұмыстар жүргізілді.
Қызылорда облысының полиция Департаменті ата-аналарды төтенше режим кезінде жарияланған карантин талаптарын сақтап, балалардың жүріп тұруын қадағалауды сұрайды.
