Ұлытау облысы аумағында «Борышкер» жедел-профилактикалық іс-шарасы өтіп жатыр, – деп хабарлайды Polisia.kz.
Шараның мақсаты – қала тұрғындарына әкімшілік құқық бұзушылық бойынша шығарылған қаулыны уақытында төлеу керек екенін түсіндіру. Яғни, әкімшілік құқық бұзушылық туралы хаттама рәсімделген күннен бастап 7 тәулік ішінде салынған айыппұлдың 50 пайыз жеңілдікпен төлеу мүмкіндігі мен әкімшілік құқық бұзушылық қаулысы шыққан күннен бастап 30 күн мерзімде ерікті түрде айыппұлды өндіру түсіндіріліп жатыр.
Аталған іс-шараға әкімшілік полиция басқармасының қызметкерлерімен бірге жергілікті полиция және өңірлік жеке сот орындаушылары жұмылдырылған. Бірлескен іс-шара аясында айыппұл төлеуден жалтарып жүрген борышкерлердің автокөліктерін автотұраққа қою және мемлекеттік белгілерін алу жүзеге асырылып жатыр.
Іс-шараның нәтижесі бойынша құрылған жұмыс тобымен қызмет атқару барысында 9 автокөлік айып алаңына қойылып, 492 айыппұлды уақытылы төлемеген автокөлік иелеріне хабарлама таратылды.
