Ақтөбеде жаңа үлгідегі учаскелік полиция пункті іске қосылды, – деп хабарлайды Polisia.kz.
Сервистік үлгідегі жаңа полиция пунктінің ашылу рәсіміне облыс әкімі Е.Тоғжанов пен облыстық полиция департаментінің бастығы А.Жусупов қатысты.
Полицейлердің кәсіби мерекесі күніне орайластырылған шарада облыс әкімі Ералы Тоғжанов полицейлерге жаңа 27 Hyundai Elantra автокөлігінің кілтін табыстап, қызметтеріне сәттілік тіледі. Сонымен қатар облыс әкімі қызметте жоғары жетістіктерге қол жеткізген полицейлерді өз құқығымен марапаттады.
ПД бастығы Абай Жусупов өз сөзінде қауіпсіздікке аса көңіл бөліп, полицейлерге көрсетіп жатқан тұрақты қолдауы, оның ішінде сервистік үлгідегі полиция пунктінің құрылысы үшін облыс әкімдігіне жеке құрам атынан алғыс білдірді.
– Сервистік полиция – халыққа барынша сапалы қызмет көрсету мен қауіпсіздікті қоғаммен серіктестікте қамтамасыз етуге бағытталған қадам. Жаңа полиция пунктінде халық үшін де, полицейлер үшін де жақсы жағдай жасалған. Біз қауіпсіздікті азаматтық қоғаммен серіктестікте қамтамасыз ету тұжырымдасының негізінде халықпен бірлесіп жұмыс жасауға әрқашан дайынбыз, ашықпыз, – деді ол полиция пунктінің ашылу рәсімінде.
Жаңа полиция пункті Ақтөбенің тұрғындар саны қарқындап өсіп жатқан Есет батыр тұрғын алабында көпқабатты үйдің 1-қабатында орналасқан, жалпы алаңы 466 шаршы метрді құрайды. Мұнда учаскелік полиция инспекторлары, кәмелетке толмағандар істері жөніндегі инспекторлармен қатар, көші-қон қызметі, әкімшілік практика, пробация қызметкерлерінің жұмыс орындары, демалыс орындары қарастырылған. Ерікті көмекшілерге арналған кабинет, азаматтарды қабылдау бөлмесі, ана мен бала бөлмесі де бар. Мүмкіндігі шектеулі тұлғаларға кедергісіз кіруге жағдайлар жасалған, оның ішінде арнайы жабдықталған санитарлық тораптар да бар. Полиция пункті бейнебақылау жүйесімен жабдықталған және мұнда қызмет көрсететін аумағының бейнебақылау камералары шығарылған.
Мұның барлығы полицияның ашықтығы, қолжетімділігі, құқық бұзушылықтар мен азаматтардың өтініштеріне жедел ден қоюы үшін жасалған. Жаңадан ашылған УПП Есет батыр тұрғын алабының №1, 2, 3, 4 мөлтек аудандары, Қызылжар №1, 2, 3 ауылдары, Рауан, Шығыс ауылдарына, “Геофизик” бау-бақша ұжымына қызмет көрсететін болады.
