Қызылордада “Қарасора – 2023” іс-шарасының барысында құрамында есірткісі бар өсімдік өсірумен айналысқан 21 адам құрықталып, оның 6-ы қамауға алынды, – деп хабарлайды Polisia.kz.
Қазіргі уақытта республика көлемінде есірткі қылмысының жолын кесуге бағытталған “Қарасора – 2023” жедел-профилактикалық іс шарасы өтіп жатыр. 1 маусымда басталған іс-шара 31 қазанға дейін өткізілмек.
“Қарасора – 2023” шарасының басты мақсаты – есірткіге байланысты құқық бұзушылықтардың алдын алу және оларға қарсы іс-қимыл жасау, сондай-ақ құрамында есірткі бар өсімдіктерді өсіру және дайындау фактілерінің жолын кесу.
Іс-шара басталғалы облыс көлемінде барлығы 38 есірткі құқық бұзушылықтары анықталса, оның ішінде 17 дерегі есірткі өсіру, 2 дерегі есірткі өткізу, 1 дерегі аса ірі мөлшерде сақтау және 18 дерегі есірткіге байланысты қылмыстық теріс қылықтар. Заңсыз айналымнан 7 келі марихуана және 366 келі каннабис өсімдігі алынды.
Есірткі өсірумен айналысқан 21 адам құрықталып, оның 6-ы қамауға алынды.
Қазалы, Сырдария, Шиелі аудандары аумағының далалық аймағынан ірі есірткі алқаптары анықталды.
