“Жолда қабылдау” акциясында генерал-майор Қайрат Дәлбековтің атына алғыс айтылды,-деп хабарлайды Polisia.kz.
Қала тұрғыны Абдуалиев Акрамжон есімді азамат “Жолда қабылдау”
республикалық акциясына келіп, Түркістан облысы Полиция департаментінің бастығы Қайрат Дәлбеков пен тергеуші Алтаев Еділдің тарапына ризашылығын жеткізді. Облыстық полиция қызметкерлері қылмыстық іске байланысты істі әділ жүргізіп, күдіктілерді дер кезінде ұстаған. Нәтижелі әрі жедел атқарылған жұмысқа өз алғысын айтты.
Акция ағымдағы жылдың 14-15 ақпан аралығында Түркістан облысы Полиция департаментіне қарасты азаматтарды қабылдау бөлмелерінде қатарынан екі күн бойы өткізілген болатын. Таңғы сағат 9:00-ден бастап азаматтарды қабылдаған полицейлерге 2 мыңнан астам облыс тұрғындары келіп, сұрақтарын қойды. Қаланың өзгеруіне байланысты кейбір жол қиылыстары, бағдаршамдар мен жол белгілеріне байланысты ойларын жеткізді.
Республикалық акция аясында тұрғындарды тікелей өзі қабылдаған Түркістан
облысы Полиция департаменті бастығының орынбасары Абдуғани Сейдуалиев қойылған сұрақтардың барлығына нақты жауап берді. Келушілердің қойған сауалдарының басым бөлігі шетелден әкелінген көлік құралдарын тіркеу, оған төленетін кедендік баждар мен көші-қон саласына қатысты болды. Оған қоса полицейлер азаматтарға көлік құралдарын тіркеу тәртібі мен ережелерін егжей-тегжейлі түсіндіріп, қажетті кеңестерін берді.
Полиция полковнигі А.Сейдуалиев: “Акция кезінде азаматтарды қызықтыратын мәселелер кеңінен талқыланды. Олар шетелден әкелінген көлік құралдарын рәсімдеу тәртібімен танысты. Оның ішінде алғыс айтқан азаматтар да болды. Ал кейбір ашылмай жатқан қылмыстар бойынша түскен сауалдар күн тәртібіне қойылды”,- деп атап өтті.
Қабылдау кезінде азаматтар көлік айыппұлдарының бар-жоғы және төлемі
туралы біле алды. Тәртіп сақшылары басқа да аумақтағы полиция құрылымдарымен телефон арқылы хабарласып, әрбір тұрғынның мәселесін сол сәтте шешуге тырысты.
