Түркістан облысы бойынша ҚАЖ департаментінде Тәуелсіздікпен түйдей құрдас бес полицей қызмет атқарады, – деп хабарлайды Polisia.kz.
Олар бұл салаға әр жылдары келгенімен, бәрінің ұстанымдары бір. Еліміздің ішкі тәртібіне жауапты.
Осыдан 30 жыл бұрын дүние есігін ашқандардың бірі – нәзік жанды полицей Мадина Жақсылықова. Ол қазіргі таңда Түркістан облысына қарасты Түркістан қалалық пробация қызметінің аға инспекторы.
– Тәуелсіздіктің құрдасы атану мен үшін үлкен мәртебе, әрі мақтаныш. Мен Тәуелсіз Қазақ елінің топырағында дүниеге келдім, ашық аспан астында, бейбіт күнде өмір сүрудемін. Кезінде ата-бабамыз сан мыңдаған жылдар бойы егемендікті аңсап, найзаның ұшымен, білектің күшімен күресіп жеткен бала кезімде тарихи кітаптарды көп оқитынмын. Сонда, қазақ елінің қандай сындарлы кезеңдерді басынан өткізгенін оқып, олардың жанкештіліктеріне қайран қалатынмын. Қарап отырсам, осы күнге жетуімізде әрбір кезеңі жанқиярлық ерлік, батырлық, ержүректік екенін байқауға болады. Бала кезімде әкем секілді халқымыздың қауіпсіздігі мен тыныштығын қорғасам, тәуелсіздігіміздің қорғаны, еліміздің мықты қалқаны болсам екен деп армандаушы едім. Міне, бүгін балалық арманым орындалып, елімнің тыныштығын қорғау барысында еңбек етіп келемін, – деді Мадина.
Нәзік жанды полицей 1991 жылы 28 қаңтарда Шығыс Қазақстан облысында дүниеге келді. Он бір жылдық мектепті бітіріп, Павлодар қалалық заң колледжіне оқуға түседі. Оқуын озат аяқтаған қыз өзінің туған өлкесі Павлодар облысының пробация қызметіне инспектор болып қызметке орналасады. Қызметінің ауырлығына қарамастан Мадина өзінің таңдауына еш өкінген емес. Қызметпен қатар 2010 жылы Павлодар мемлекеттік университетінің заң факультетіне сырттай оқуға түседі. Он бір жылдық еңбектің арқасында Мадина бүгінде Түркістан облысы бойынша ҚАЖ департаментіне қарасты Түркістан пробация қызметінің аға инспекторы әділет капитаны. Мадина бір ұл, бір қыз тәрбиелеп отыр. Ұлы анасы секілді полиция қызметкері болуды армандайды.
