Түркістан облысының полицейлері республика аумағында заңсыз жүрген шетелдіктерді анықтады, – деп хабарлайды Polisia.kz.
Түркістан облысының полицейлері облыс аумағында «Заңсыз келуші – 2022» профилактикалық іс-шарасын жүргізуде. Шараның басты мақсаты – Қазақстан аумағына заңсыз келген, жұмыс жасап жүрген шетел азаматтарын анықтау. Сонымен қатар, көші қон заңнамасын сақтау бойынша шетелдіктер мен оларды қабылдаушы азаматтар арасында түсіндірме жұмыстарын жүргізу.
Аталған іс-шара кезінде Қазығұрт аудандық полиция қызметкерлері Қазақстан Республикасында заңсыз жұмыс істеп жүрген жеті азаматты анықтады. Нақтырақ айтар болсақ, шетелдіктерге ҚР ӘҚБтК-нің 517-бабы 5-бөлігі (Шетелдiктiң немесе азаматтығы жоқ адамның Қазақстан Республикасының халықтың көші-қоны саласындағы заңнамасын бұзуы) бойынша хаттама толтырып, соттың қаулысымен бір тәулікке арнайы қабылдап тарату бөліміне жабылды. Сондай-ақ, республика аумағында мерзімі өтіп кеткен бір азаматқа ҚР ӘҚБтК-нің 517-бабы 4-бөлігімен (Шетелдiктiң немесе азаматтығы жоқ адамның Қазақстан Республикасының халықтың көші-қоны саласындағы заңнамасын бұзуы) бойынша әкімшілік хаттама толтырып, сот қаулысымен 76 575 теңге көлемінде айыппұл салды.
Тұрғын үймен қамтамасыз еткені үшін Қазақстан Республикасының екі азаматына ҚР ӘҚБтК-нің 518-бабы 1-бөлігі (Шетелдiктерді және азаматтығы жоқ адамдарды қабылдайтын жеке немесе заңды тұлғалардың Қазақстан Республикасының халықтың көші-қоны саласындағы заңнамасын бұзуы) бойынша әкімшілік шара көрілді.
Бұл бағыттағы шаралар Қазақстан аумағына заңсыз келушілер мен жұмыс жасайтын шетел азаматтарының санын азайтады. Алдағы уақытта мұндай тексеру жұмыстары полицейлер тарапынан өз жалғасын таба бермек.
