Ұлытау облысында 19 мотокөлік айыптұраққа қойылды, – деп хабарлайды Polisia.kz.
Ұлытау облысының полиция департаменті жол-көлік жарақаттануының алдын алу және жол қозғалысын қадағалау тиімділігін күшейту мақсатында «Қауіпсіз жол» жедел алдын алу іс-шарасын ұйымдастырды. Жазғы маусымның басталуымен мотоциклді пайдаланушылар саны артып барады. Соңғы жылдары көлік құралының бұл түрін пайдалану балалар мен ересектер арасында үлкен танымалдылыққа ие болуда. Оларға мопедтер, электрлік скутерлер және гироскутерлер жатады.
Мамыр айының басында жасөспірімдердің қатысуымен екі жол-көлік оқиғасы тіркелді. 2 мамыр күні сағат 20.00 шамасында Жезқазған қаласы ПБ Абай көшесінде орналасқан үйдің жанында жол-көлік оқиғасы болғандығы туралы хабарлама келіп түсті. 23 жастағы жолаушылар көлігінің жүргізушісі жол бермей, 15 жастағы жасөспірімнің басқаруымен мопедпен соқтығысқаны анықталды. Жол-көлік оқиғасы салдарынан кәмелетке толмаған бала түрлі ауырлықтағы жарақаттар алып, медициналық мекемеге жатқызылды.
Жедел-профилактикалық іс-шара барысында жол қозғалысы ережелерін бұзған 19 мотокөлік айыппұл тұрағына қойылды. Сонымен қатар ҚР ӘҚБтК-нің 608-бабы бойынша мас күйінде автокөлікті басқарғаны үшін 10 автокөлік жүргізушісі ұсталды. Көлік құралдарын басқару құқығынан айырылған және мас күйінде жүрген адамның көлік құралын басқарғаны үшін Қазақстан Республикасының ҚК-нің 346-бабы бойынша үш жүргізуші анықталып, қылмыстық іс қозғалды. Іс-шара барысында жол қозғалысы ережелері бойынша 300-ден астам бұзушылық анықталды.
