Полиция департаментінде «Донор күні» науқаны өтті. Оған ШҚО ПД аппаратының 50-ден астам қызметкері қатысты, – деп хабарлайды Polisia.kz.
Таңертеңнен бастап акт залының жанында қан компоненттерін құюға мұқтаж адамдарға көмектесуге дайын тәртіп сақшылары кезекке тұрды.
Жылдан-жылға қан тапсырғысы келетіндердің саны өсіп келеді. Бұл жолы бірі алғаш рет қан тапсырса, кейбіреулері медициналық қызметкерлермен жақсы таныс, бірақ олардың барлығын бір мақсат қана біріктіреді – адамдарға көмектесу ниеті.
Қызмет борышы бойынша құқық қорғау органдары жол-көлік оқиғасынан зардап шеккен адамдарға басқаларға қарағанда жиі кездеседі және қан құю өмірді сақтау үшін өте маңызды екендігін біледі.
– Қазақстан полициясы күні қарсаңында Шығыс Қазақстан облысы полиция департаменті аппаратының қызметкерлері игі дәстүрді жалғастыра отырып, донор болды. Мұндай іс-шарадан қалыс қалғымыз келмейді, себебі адамдарға көмектесу – біздің тікелей міндетіміз, – деді кадр саясаты басқармасының бастығы Ерхат Шалқыбаев.
Дәрігерлер полицейлерді мінсіз донор екендігін бірнеше рет атап өтті. Себебі олар денсаулығына жіті көңіл бөліп, медициналық тексерулерден үнемі өтіп тұратындарын алға тартты.
– Біз департаменттің барлық донорларына, шын жүректен алғыс айтамыз! Барлық қызметкерлерге мықты денсаулық, жоғары гемоглобин және көтеріңкі көңіл-күй тілейміз! Жақсы үлгі көрсеткендері үшін рақмет! Біздің донорларымызға амандық пен табыс тілейміз!, – деді медицина орталығының маманы Мира Мустафина.
Науқан маусым айының соңына дейін жалғасады. Оған Шығыс Қазақстан облысының қалалық және аудандық полиция бөлімдерінің тәртіп сақшылары да қатысады.
