Жетісу облысының патрульдік полицейі қызметі туралы айтып берді, – деп хабарлайды Polisia.kz.
Талдықорған патрульдік қызмет ротасының полицейі Данияр Базарбаев адам өмірін құтқарып, өртте көрсеткен қайсарлығы үшін ҚР ТЖМ-нің медалімен марапатталды.
– Патрульдік полицейдің жұмыс күні таңғы алтыда басталады. Таңертеңгі жұмысымызды реттеп, міндетті нұсқамадан өткеннен кейін біз қоғамдық тәртіпті сақтауға шығамыз. Бір аусымда әрбір патрульдік экипаж кем дегенде 20 қоңырау бойынша қызмет атқарады. Бұл отбасылық жанжалдан бастап, көшеде немесе кафелердің бірінде орын алған төбелес пен ауыр қылмыс болуы мүмкін. Бізге келіп түскен қоңырауға тез және нақты жауап беру қажет. Кейде құқық бұзушыларды ұстап қана қоймай, алғашқы медициналық немесе психологиялық көмек көрсетуге тура келеді, – деп атап өтті Данияр.
Құқық қорғау органдарында, әсіресе патрульдік полицияда қызмет ету оңай іс емес, көбіне күн, түн демей жұмыс істеуге тура келеді. Бұл жұмыста тәуекелдермен қатар, қауіптер де бар. Дегенмен, патрульдік полицейлер тәулік уақыты, ауа-райына қарамастан азаматтардың тыныштығы мен қауіпсіздігі үшін қызмет етеді.
– Түнгі ауысым күрделірек, өйткені ауыр қылмыстардың көбі түнде жасалады. Бірақ қиындықтарға қарамастан, халықты қылмыстық қол сұғушылықтан қорғау – біздің міндетіміз. Сондай-ақ дереу әрекет етуді қажет ететін сәттер де аз емес. Осыдан бір-екі ай бұрын, түнгі ауысымда серіктесім екеуміз екі қабатты дүкеннің өртеніп жатқанын байқадық. Бірден өрт сөндіру қызметін шақыртып, олар келгенге дейін іштегі адамдардың бар-жоғын тексеруді шештік, – деп қосты Д. Базарбаев.
Естеріңізге сала кетейік, Талдықорған аудандарының бірін патрульдеу кезінде «Бүркіт-164» экипаж қызметкерлері облыс орталығының Сырттанов көшесіндегі Жанна дүкенінің өртеніп жатқанын байқаған. Сауда орны көпқабатты үйдің бірінші қабатында орналасқан. Бірінші қабаттың терезелері торланған, есіктері жабық болып шықты. Тәртіп сақшылары шатырға шығып, терезе арқылы екінші қабаттағы пәтерге кіруге мәжбүр болды, онда қарт адам мен жас қыз болған. Екеуі де тез арада эвакуацияланды. Пәтерде сондай-ақ екі газ баллоны болған, полицейлер жарылыстың алдын алу үшін оларды жалынға оранған үйден алып шықты.
– Алға қойған мақсаттарға жету үшін адал еңбек етіп, өз ісінді сүю, адамдарды құрметтеу қажет. Ең бастысы, күнделікті тәртіпте ортақ істің қажеттілігі мен маңыздылығын ұмытпау керек, – деп түйіндеді Данияр Базарбаев.
Даниярды үйде ата-анасы, жұбайы мен екі кішкентай баласы қызметтен аман-есен келгенін асыға күтіп, алаңдаумен қатар мақтан тұтады.
