Биыл Талдықорғанда «102» арнасына 10 мыңнан астам хабарлама тіркелген, – деп хабарлайды Polisia.kz.
Көбінесе нақты уақыттағы басқару орталығы деп аталатын полицияның жедел басқару орталығы қоғамдық қауіпсіздікті қамтамасыз етуде және полиция қызметін үйлестіруде маңызды рөл атқарады.
Бұл орталық құқық қорғау органдары құрылымының құрамдас бөлігі және әртүрлі жағдайларға, оның ішінде төтенше, қылмыстық әрекеттерге және басқа да жағдайларға жедел ден қоюды қамтамасыз етеді.
– Бүгінде, артық айтпағанда, «102» хабарлама қабылдау арнасы азаматтар арасында ең сұранысқа ие деп атауға болады. Жыл басынан бері әртүрлі сипаттағы 10 мыңнан астам хабарлама тіркелген. Оның ішінде 562 қылмыс тіркеліп, оның 334-і ашылды, із-түссіз жоғалған 11 адам табылды, – деп атап өтті Талдықорған ҚПБ ЖБО бастығы Айдын Ибраев.
Жедел басқару орталығы қызмет көрсету аймағындағы жағдайды тұрақты бақылауды, оқиғалар болған жерде полициямен, сондай-ақ басқа да шұғыл әрекет ету қызметтерімен байланысты қамтамасыз ететін озық технологиялармен жабдықталған.
– Қоғамдық қауіпсіздікті қамтамасыз етуге арналған жобалардың аясында жедел басқару орталығына 11 мыңнан астам бейнекамера қосылған. Білім беру ұйымдарында қауіпсіздікті қамтамасыз ету үшін орталықтан басқарумен кезекшілік пункттеріне бейнебақылау жүйесі қосылып, «SOS» түймелері орнатылды, – деп толықтырды А. Ибраев.
Жедел басқару орталығының негізгі функцияларына азаматтардан шұғыл шақыруларды қабылдау және өңдеу, қылмыс болған жерде іс-қимылдарды үйлестіру, полиция жасақтарын жіберу, қоғамдық тәртіпті қадағалау, арнайы операцияларды басқару және ірі қоғамдық іс-шаралардың қауіпсіздігін қамтамасыз ету кіреді.
Қазіргі заманғы полицияның жедел басқару орталықтары қоғамдық қауіпсіздік жүйесінің маңызды буыны және қоғамдық қауіпсіздікке қатер төндіруі мүмкін оқиғаларға жедел ден қоюда шешуші рөл атқарады.
