Маңғыстау облысында есептегі сотталғандардың құқық бұзушылықтарының алдын алу бойынша кездесу өтті, – деп хабарлайды Polisia.kz.
Маңғыстау облысында пробация есебінде тұрған азаматтар жіберетін құқық бұзушылықтардың алдын алу және қайта қылмыс жасауына жол бермеу мақсатында сотталғандармен маңызды кездесу өтті. Іс-шараға Маңғыстау облыстық прокуратурасының үкімдердің орындалысын қадағалау басқармасының бастығы Асылбек Асанов, ҚАЖ департаменті бастығының орынбасары Амир Досқалиев, Ақтау қаласының прокуратура өкілдері, сондай-ақ пробация қызметінің инспекторлары қатысты.
Кездесу барысында пробация қызметіндегі құқықтық тәртіпті сақтау, есебіндегі сотталғандарды қолдау, олардың әлеуметтік бейімделуін нығайту мәселелері қарастырылды. Сотталғандар өздерін қызықтырған сұрақтарды қойып, мамандардан кеңес алды. Кездесуге қатысушылар тәртіп пен жауапкершілікке қатысты сұрақтарды егжей-тегжейлі талқылады. Асылбек Асанов пен Амир Досқалиев құқық бұзушылықтардың алдын алу шараларының маңыздылығына ерекше тоқталып, қоғамға бейімделу жолында заңды сақтау қажеттілігін ескертті.
Жыл басынан бері жаза өтеу шарттары мен тәртібін сақтамаған және бірнеше рет ескерту алған 147 азаматқа қатысты сотқа ұсыныс жолданып, оның нәтижесінде 107 сотталғанның жаза түрі ауыстырылып, олар қайтадан ҚАЖ мекемелеріне қайтарылды. Бұл шаралар пробация қызметінің құқықтық тәртіпті қадағалаудағы маңызды рөлін көрсетіп, сотталғандардың қоғамға бейімделуіне бағытталған жұмыстардың тұрақты түрде жүргізіліп жатқанын айғақтайды.
Сонымен қатар пробация есебіндегі тұлғалардың әлеуметтік, психологиялық және құқықтық қолдауға мұқтаждығы ескеріліп, қатысушыларға өз құқықтары мен міндеттері түсіндірілді, қайта қылмыс жасау тәуекелдерін азайту бойынша арнайы нұсқаулықтар берілді.
