Жетісу облысында «Жас сақшы» жобасы аясында жастармен дөңгелек үстел ұйымдастырылды, – деп хабарлайды Polisia.kz.
Жетісу облысы полиция департаментінің ғимаратында жастарды қауіпсіздік және қылмыстың алдын алу мәселелері туралы ақпараттандыру бойынша белсенді іс-шаралар бастау алды. Тілші Дина Балқашқызымен бірлесіп ұйымдастырылған «Жас сақшы» жобасы аясында дөңгелек үстел өтті.
Іс-шараның негізгі мақсаты – оқушылар мен студенттерге кибербуллинг, есірткі қылмысы, бопсалау және басқа да қауіптер туралы жасырын түрде хабарлау үшін маңызды ақпаратты жеткізу.
Осы мақсатта WhatsApp мессенджерінде арнайы чат құрылды, онда әр оқушы бұзушылықтар туралы ақпаратпен жасырын түрде бөлісе алады. Мұндай бастама өңір жастарының басым бөлігін қамтуға және құқық бұзушылықтар туралы қауіпсіз және ашық ақпарат алмасу үшін платформа құруға мүмкіндік береді.
Полиция департаментінде өткен іс-шара барысында оқушыларға жастар қылмысы және оның салдары туралы бейнероликтер көрсетілді. Сондай-ақ қатысушылар департамент мұражайында өңір полициясының тарихымен танысып, Жедел басқару орталығының жұмысын өз көздерімен көрді.
Кездесуге қатысқан мұғалімдер мен оқушылар «Жас сақшы» жобасына қолдауын білдірді. Олар сұрақтар қойып, жастардың қауіпсіздігі мен құқықтарын қорғау тақырыбына қызығушылық танытты.
