Семейде ҚАЖД қызметкерлері жекпе-жектен шеберлік сабағына қатысты, – деп хабарлайды Polisia.kz.
Абай облысы бойынша Қылмыстық-атқару жүйесі департаментіне қарасты №21 мекемесінің жас қызметкерлері Семей қаласындағы «Әлем» спорт залында ерекше мүмкіндікке ие болды. Олар Қазақстан Республикасының еңбек сіңірген спорт шебері Исатай Қасеновтің шеберлік сабағына қатысты.
Исатай Қасенов — таэквондодан спорт шеберіне кандидат, 4 дүркін Әлем чемпионы, Азияның 4 дүркін чемпионы, Қазақстанның 10 дүркін чемпионы, 3 мәрте Әлем кубогының жеңімпазы, 2 мәрте «Әлем Барысы» және 2 мәрте «Қазақстан Барысы» атағына ие болған танымал спортшы.
Сонымен қатар ол Абай облысы полиция департаментінің арнайы және жұмылдыру дайындығы басқармасының инспекторы болып қызмет етеді.
Бұл шара мекеме қызметкерлерінің дене дайындығын жетілдіру және жекпе-жек әдістерін кәсіби қызметте қолдану дағдыларын дамыту мақсатында ұйымдастырылды. Шеберлік сабағының басында тәжірибелі жаттықтырушылар ұрыс техникасы мен өзін-өзі қорғаудың негізгі әдістерін теориялық түрде түсіндірді. Кейіннен қатысушылар соққы жасау, ұрыс әдістерін меңгеру және өзін-өзі қорғаудың түрлі элементтерін тәжірибеде қолдану арқылы өз дағдыларын жетілдірді.
Шара барысында критикалық жағдайларда мінез-құлық тактикасы мен стратегияларына ерекше көңіл бөлінді. Қатысушылар күтпеген жағдайларда қалай әрекет ету керектігін үйреніп, нақты тәжірибеден өтті.
Кадр бөлімінің өкілі атап өткендей, жыл сайын мекеме қызметкерлері дене және өртке қарсы дайындық бойынша қорытынды сынақтар тапсырады. Қыркүйек пен қараша айларында өтетін бұл сынақтар барысында әрбір қызметкер белгілі бір стандарттарға сәйкес дене жаттығуларын орындап, өзін-өзі қорғау әдістерін көрсетіп, ату шеберлігі мен теориялық білімдерін дәлелдеуі қажет.
Шара соңында қатысушылар өздерінің кәсіби деңгейін көтеруге ықпал еткен мазмұнды шеберлік сабағы үшін жаттықтырушыларға шексіз алғыстарын білдірді.
