Талдықорғандық студенттерге алаяқтардан қорғану жолдары түсіндірілді, -деп хабарлайды Polisia.kz.
Талдықорған қаласындағы Политехникалық колледжде киберполиция қызметкерлері студенттерге интернеттегі қауіптер мен алаяқтардан қорғану әдістері туралы дәріс өткізді. Қазіргі таңда цифрлық технологиялар өмірдің барлық салаларына еніп, киберқауіпсіздік жастар үшін маңызды дағдыға айналуда.
Киберпол өкілдері жастар жиі ұшырайтын интернет-алаяқтықтың ең көп таралған түрлерін таныстырды. Басты қауіптердің бірі – жеңіл табыс табу уәдесімен қылмыстық схемаларға тарту. Алаяқтар студенттерді дроппер ретінде пайдаланып, оларды өздерінің банк шоттары арқылы ақша аударымдарын жүзеге асыруға көндіреді. Нәтижесінде, мұндай қызметкерлер қылмыстық іс-әрекеттерге қатысы бар тұлғалар ретінде жауапкершілікке тартылуы мүмкін.
Дәріс барысында полиция қызметкерлері шынайы жұмыс ұсыныстарын алаяқтық схемалардан қалай ажыратуға болатыны және киберқауіптерден қорғану шаралары туралы маңызды ақпарат берді. Негізгі ұсыныстардың қатарында жеке деректер мен банк реквизиттерін бөтен адамдарға бермеу, күмәнді қаржылық операцияларға қатыспау және жұмыс берушінің сенімділігін алдын ала тексеру болды.
Сонымен қатар жеке деректерді, парольдерді және әлеуметтік желідегі аккаунттарды қорғау тәсілдеріне ерекше назар аударылды.
Мұндай ақпараттық іс-шаралар студенттерге киберқауіпсіздіктің маңыздылығын ұғынуға және интернетте алған ақпаратқа сыни тұрғыдан қарау дағдысын дамытуға көмектеседі.
