Абай ауданында отбасылық зорлық-зомбылыққа қарсы акция өтті, - деп хабарлайды Polisia.kz.
Абай ауданында отбасылық-тұрмыстық зорлық-зомбылықпен күреске бағытталған әлеуметтік акция өтті. Абай ауданы полиция бөлімінің жергілікті полиция қызметінің отбасылық-тұрмыстық зорлық-зомбылықпен күрес тобының аға инспекторы Жанаргүл Апсалямова мен Абай ауданының ішкі саясат, мәдениет және тілдерді дамыту бөлімінің бас маманы Айнұр Бакирова азаматтарға отбасылық зорлық-зомбылықтың алдын алудың маңыздылығы туралы еске салды.
Іс-шара барысында ұйымдастырушылар аудан тұрғындарына зорлық-зомбылықтың қандай түрлері бар екенін, оны қалай тануға болатынын және көмек алу үшін қайда жүгіну керектігін түсіндірді. Ерекше назар әйелдер мен балалардың құқықтарын қорғауға аударылды, себебі олар көбінесе тұрмыстық зорлық-зомбылықтың құрбанына айналады.
Азаматтарға зорлық-зомбылыққа қарсы наразылықтың халықаралық белгісі – ақ ленталар таратылды. Бұл белгі қоғамның назарын мәселеге аударып, әр адамның қауіпсіздік пен қорғау құқығына ие екенін көрсетуге арналған. Акция тұрғындар арасында қолдау тауып, көпшілік мұндай шаралардың маңыздылығын атап өтті.
Сонымен қатар акция барысында зорлық-зомбылықтың алдын алу шаралары мен жәбірленушілерді қорғаудың қолданыстағы механизмдері талқыланды. Азаматтарға зорлық-зомбылық қаупі төнген жағдайда қандай әрекет жасау керектігі және құқық қорғау органдарына арыз беру тәртібі түсіндірілді.
Ұйымдастырушылар зорлық-зомбылықтың кез келген фактілері бойынша полиция бөліміне жедел жүгіну немесе "102", "111", "150" сенім телефондарына қоңырау шалу қажеттігін ескертті.
Әрбір хабарлама маңызды және біреудің өмірін сақтап қалуы мүмкін! Баршаға қауіпсіз орта құру – ортақ міндетіміз. Тек бірлесе отырып, немқұрайлы болмай, жәбірленушілерге қолдау көрсете отырып, біз зорлық-зомбылықтан азат қоғам құра аламыз.
