Ақпараттық медиа-портал POLISIA.KZ

Жамбыл облыстық ПД бастығы оқушылармен кездесті

Тараз қаласындағы №30 мектеп қабырғасында ерекше сабақ өтті. Полиция департаментінің бастығы Бақытжан Малыбаев оқушылармен заң турасында әңгімелесті, – деп хабарлайды Polisia.kz.

ПД бастығы балаларға қоғамдық орындарда жүріп-тұру ережелері, жолдағы қауіпсіздік дағдылары туралы айтып, ғаламтор желісіндегі қауіпсіздік мәселесіне, қоғамда "Заң және тәртіп" қағидатын нығайтудың маңыздылығына назар аударды.

Ашық әңгіме оқу орындарындағы буллинг, бопсалау, жасөспірімдерді есірткі саудасына тарту секілді өткір тақырыптарды талқылауға ұласты.

- Сіздер – еліміздің болашағысыздар. Сіздердің білімдеріңіз, тәрбиелеріңіз бен Отанға деген сүйіспеншіліктеріңіз біздің ертеңіміз қандай болатынын айқындайды, - деді Б.Малыбаев оқушыларға.

Оқушылар "Полиция қызметкері қандай қасиеттерге ие болуы тиіс?", “Полицейлер қызметте қаншалықты жиі қауіпті жағдайларға тап болады?” сынды әртүрлі сұрақтар қойды. ПД бастығы сауалдарға жауап бере отырып, кәмелетке толмағандардың қатысуымен жасалған нақты қылмыстық деректер туралы айтып берді.

Кездесу соңында қатысушыларға құқықтық нормаларды білу және құрметтеу қаншалықты маңызды екенін мысалмен түсіндірілген қысқа бейнероликтер көрсетілді. Ең белсенді оқушыларға ПД бастығы Қайрат Жолдыбайұлының “Кемел адам” танымдық кітабын табыс етті.

Мектеп мұғалімдері атап өткендей, осындай ашық форматтағы кездесулер жастардың тәртіп сақшыларына деген сенімін арттыруға көмектесіп, уақытында көтерілген мәселелер мен ашық сұрақтар асығыс әрекет пен қайғылы оқиғалардың алдын алады.

"Жасөспірім" жедел-профилактикалық іс-шарасы аясында өткізілген іс-шара барысында ПД бастығы дабыл түймесінің, бейнебақылау камераларының жұмысын тексерді.

Сондай-ақ оқыңыздар

Жауап қалдыру