Ұлттық ұлан жауынгерлері Абайдың 180 жылдық мерейтойында жоғалған балаларды тапты, - деп хабарлайды Polisia.kz.
9 тамызда Абай облысының Қарауыл ауылында ұлы ақын, ойшыл Абай Құнанбайұлының 180 жылдығына арналған мерекелік көңіл-күй күтпеген оқиғамен біраз уақытқа алаңға айналды.
Мерекелік шараға жүздеген тұрғындар мен қонақтар жиналған сәтте, Ұлттық ұланның патрульдік тобына жергілікті тұрғын Әбілғазин жүгініп, 11 жастағы Айзере мен 9 жасар Мансур есімді балаларын жоғалтып алғанын хабарлады.
Бұл күні жауынгерлер қоғамдық тәртіпті қамтамасыз етіп, ауыл тұрғындары мен қонақтарының қауіпсіздігін қадағалап жүрді. Балалардың жоғалғаны туралы хабар түскен бойда, олар халықтың тығыз шоғырлануы мен қызу өткен мерекелік бағдарламаға қарамастан, дереу іздестіру жұмыстарына кірісті.
Іздеу көпке созылмады: патруль бағытының бойынан табылған балалар сәл шошынғанымен, дін аман еді. Әскерилер оларды бірден ата-анасына жеткізді. Әкелерінің қуанышы мен жеңілдеп жылаған сәті айналадағы жұртты да толқытты.
Айта кетейік, 5518 әскери бөлімінің 150-ден астам ұландық жауынгері Қарауыл ауылында өткен Абай Құнанбайұлының 180 жылдық мерейтойына арналған ауқымды шарада қоғамдық тәртіп пен қауіпсіздікті қамтамасыз етті.
