Қызылорда облысында полиция мен тұрғындар жоғалған жасөспірімді іздеп тапты, — деп хабарлайды Polisia.kz.
21 тамыз күні кешке Қазалы аудандық полиция бөліміне 14 жастағы жасөспірімнің жоғалып кеткені туралы хабарлама келіп түсті. Бала үйіне оралмаған. Ақпарат түсе салысымен, тәртіп сақшылары бір минут та жоғалтпай, іздестіру шараларын бастады.
Іздеу жұмыстарына жергілікті тұрғындар да бей-жай қарамай, белсенді атсалысты. Қараңғы түссе де, ондаған ерікті азамат баланы табуға көмектесу үшін көшеге шықты. Олар елдімекен ішін, саябақтарды, қараусыз қалған ғимараттарды шолып, әр бұрышты мұқият қарады.
Полиция қызметкерлері ауылдан тыс аймақтарды да қамту үшін бірнеше топ ұйымдастырып, радиусы ондаған шақырым болатын аумақты тексерді. Іздеу жұмыстары тәулік бойы тоқтаусыз жалғасып, көріну нашарлаған кезде де әрекеттерін тоқтатпады.
Жоғалған жасөспірім шамамен 2 тәуліктен кейін табылды. Ол ешқандай дене жарақатын алмаған және қазіргі уақытта ата-анасының қасында.
Жасөспірімнің әкесі баласын табуға үлес қосқан полиция қызметкерлері мен жергілікті тұрғындарға шын жүректен алғыс айтты.
Мұндай жағдайлар баршамызды балалардың қауіпсіздігіне жіті көңіл бөлу қажеттігін еске салады.
