Абай облысында сотталғандар арасында "Үмітке қадам" атты эссе байқауы ұйымдастырылды, - деп хабарлайды Polisia.kz.
Абай облысында қауіпсіздігі аралас мекеменің тәрбие бөлім қызметкерлері сотталғандар арасында эссе байқауын ұйымдастырды. Байқауға "Менің отбасым", "Бостандыққа шыққаннан кейінгі өмірім", "Менің болашағым" тақырыптары таңдап алынды. Әр тақырып қатысушыларға өз сезімдері мен үміттерін, арман-тілектерін білдіруге, өмірге жаңа, жарық қырынан қарауға мүмкіндік берді. Байқауға барлығы 16 сотталған қатысып, өздерінің жан күйзелістерін, өкініштерін және өзгеруге деген ұмтылыстарын шынайы жеткізді.
"Бостандыққа шыққаннан кейінгі өмірім" тақырыбы сотталғандардың түзелуге, жаңа өмір бастауға – жұмыс тауып, қоғамға қайта оралып, жақындары мен қоғамға пайдалы болуға деген ішкі ниеттерін көрсетті. Ал "Менің болашағым" тақырыбы аясында қатысушылар өз жоспарлары мен армандарын ортаға салды. Әр жұмыстан тіпті ең ауыр қателіктерден кейін де, адамның бәрін өзгертуге мүмкіндігі бар екеніне сенім сезілді. Отбасы жайлы эсселерде туыстардың қадірі, жіберілген мүмкіндіктерге өкіну және бұзылған қарым-қатынасты қалпына келтіруге деген ниет туралы терең ойлар айтылды.
- Байқауда жазу арқылы өзін ұсыну қатысушыларға эмоцияларын сыртқа шығаруға, дағдарыстан шығу жолдарын табуға, өмірдің маңыздылығын түсінуге және жеке өзгерістердің қажеттілігін сезінуге көмектесті, – дейді мекеменің тәрбие бөлімінің психологы Арайлым Кәдірбекова.
Іс-шара қорытындысы бойынша үздік авторлар мақтау қағаздары және алғыс хаттармен марапатталды, ал олардың жұмыстары басқа сотталғандармен тәрбие және психологиялық жұмыста қолданылатын болады. Мұндай іс-шаралар моральдық рухты нығайтып, сотталғандар арасында жеке даму мен әлеуметтік бейімделуге деген ұмтылысты қалыптастыруда маңызды рөл атқарады.
