Абай облысы бойынша ҚАЖД қызметкерлері кенттің ең қарт тұрғынын құттықтады, - деп хабарлайды Polisia.kz.
Халықаралық қарттар күні қарсаңында әйелдер колониясының қызметкерлері Абай облысының Шуақ кентінде тұратын 80 жастағы қадірлі тұрғын – елді мекеннің ең көне тұрғыны Попова Надежда Поповаға арнайы барып, мерекелік ілтипат көрсетті.
Надежда Кирилловна 1945 жылы Шығыс Қазақстан облысының Самара ауданында дүниеге келген. Орта білім алып, еңбек жолын Бокон шахтасында зарядтаушы болып бастаған. Дәл осы жерде ол өзінің болашақ жары – Шуақ ауылының тумасымен танысып, тағдырын осы өлкенің тарихымен байланыстырды. 1965 жылы шаңырақ көтерген жас отбасы ерінің туған жеріне қоныстанып, содан бері 60 жылдан астам уақыт бойы осы өңірге адалдықпен еңбек етіп келеді.
Кездесу барысында кейуана ауылдың тарихынан сыр шертіп, жүрекке жақын естеліктерімен бөлісті.
– 1965 жылы №36678 әскери бөлімнің құрылуына куә болдым. Ол – 1964 жылы Жаңғызтөбеде құрылған стратегиялық мақсаттағы зымыран әскерлерінің 57-ші зымыран дивизиясы еді. Дивизия 1995 жылдың желтоқсанына дейін жұмыс істеді. Кейін көптеген офицерлер Омбы зымыран армиясының өзге құрамаларына ауысты. 1996 жылы сол әскери бөлімнің базасында ЕС-165/7 алғашқы түзеу мекемесі ашылды, – деп еске алды Надежда Кирилловна.
Қазіргі таңда ол ұлы мен қызы дүниеге келген шаңырағында өмір сүріп жатыр. Балалары кейін Ресейге қоныс аударғанымен, ана жүрегі туған өлкесінен ажырай алмады. Жары өмірден өткен соң да ол осы жерде, естеліктерге толы үйінде ғұмыр кешуде.
– Надежда Кирилловна сынды жандармен жүздесу әрқашан ерекше әсер қалдырады. Олардың тағдыры мен естеліктері – еліміздің, туған өлкеміздің тірі тарихы. Қарттарға қамқорлық пен көңіл бөлу – аса маңызды, өйткені ол сыйлықтар мен құттықтаулардан да қымбат бақыт сыйлайды, – деді мекеме бастығының орынбасары Анар Сабиева.
