Талдықорғанда полицейлер оқушыларға профилактикалық дәріс өткізді, – деп хабарлайды Polisia.kz.
Талдықорған қаласындағы № 9 орта мектепте ұйымдасқан қылмысқа қарсы күрес басқармасының қызметкерлері қауіпсіздік, құқықтық тәртіп және жеке жауапкершілік мәселелеріне арналған кең көлемді профилактикалық дәріс өткізді. Кездесу өскелең ұрпақтың құқықтық сауатын арттыруға және өз әрекеттеріне саналы көзқарас қалыптастыруға бағытталды.
Әңгіме барысында мамандар буллинг, тонау, қарақшылық, адам саудасы және өзге де қылмыстық құқық бұзушылықтар сияқты өзекті тақырыптарға жан-жақты тоқталды. Сондай-ақ қылмыстық жауапкершіліктің басталу жасы мен ойланбай қабылданған шешімдер мен асоциалды ортаның ықпалы қандай салдарға әкелуі мүмкін екеніне ерекше назар аударылды.
— Заң отқа ұқсайды. Оны сақтағанды жылытады, ал елемегенді күйдіреді, — деп атап өтті спикерлердің бірі.
Оның айтуынша, дәл осындай ашық әрі түсінікті әңгімелер жастардың бойында заңға құрмет, әділдік сезімі және айналасындағыларға жауапкершілікпен қарау қасиеттерін қалыптастыруға ықпал етеді. Оқушылар диалогқа белсенді түрде қатысып, нақты қылмыс мысалдары туралы сұрақтар қойды, жауапкершілік шараларына және күрделі немесе жанжал туындаған жағдайларда қалай әрекет ету керектігіне қызығушылық танытты.
Ашық пікір алмасу маңызды ақпаратты жеткізіп қана қоймай, жасөспірімдер күнделікті өмірде және әлеуметтік желілерде жиі кездесетін қате түсініктерді де сейілтуге мүмкіндік берді. Кездесу соңында полиция қызметкерлері оқушыларды қырағы болуға, зорлық-зомбылық пен құқыққа қайшы әрекеттерге бейжай қарамауға, әрдайым заңды жолды таңдауға шақырды. Мұндай іс-шаралар құқық бұзушылықтың алдын алуда және саналы, жауапты азаматтарды тәрбиелеуде маңызды рөл атқарады.
