Жетісу облысында "Қауіпсіз аула" жобасы аясында құқық қорғау және өзге де мемлекеттік органдардың қатысуымен ведомствоаралық дөңгелек үстел өтті, - деп хабарлайды Polisia.kz.
Ашық диалог пен сындарлы өзара ықпалдастық жағдайында Жетісу облысы полиция департаментінің қоғамдық қауіпсіздік басқармасының қызметкерлері прокуратура, денсаулық сақтау органдары, қылмыстық-атқару жүйесі департаменті, салық қызметі және пробация қызметінің өкілдерімен бірлесе отырып, "Қауіпсіз аула" жобасы аясында дөңгелек үстел отырысын өткізді.
Іс-шара барысында тұрғындардың тыныштығы мен өмір сапасына тікелей әсер ететін өзекті мәселелер жан-жақты талқыланды. Атап айтқанда, қылмыстың алдын алу, алкогольдік мас күйде жасалатын құқық бұзушылықтардың профилактикасы, сондай-ақ алкоголь өнімдерін заңсыз сату деректерін анықтау және олардың жолын кесу мәселелеріне басымдық берілді. Сонымен бірге құқық қорғау органдарының есебінде тұрған тұлғалармен жүргізілетін жұмыстарға, соның ішінде өз өмірін түзеуге ниет білдірген азаматтарға кешенді қолдау көрсету тақырыбына айрықша назар аударылды.
Дөңгелек үстелге қатысушылар профилактика тек қадағалау мен бақылаудан тұрмайтынын, ең бастысы - азаматтарға уақтылы көмек көрсету мен қолдау білдіру екенін атап өтті. Пробация қызметінің өкілдері қиын өмірлік жағдайға тап болған азаматтарды қайта әлеуметтендіруге бағытталған әлеуметтік және құқықтық қолдау шаралары туралы ақпарат берді. Ал денсаулық сақтау саласының мамандары алкогольге тәуелділіктің алдын алу қажеттігін алға тартса, салық органдарының өкілдері алкоголь өнімдерінің көлеңкелі айналымын анықтау және шектеу мәселелеріне тоқталды.
Кездесу қорытындысы бойынша өңір аумағында бірлескен профилактикалық рейдтер ұйымдастыру туралы шешім қабылданды. Барлық мүдделі қызметтердің өкілдері аулаларда, көшелерде және адамдар көп шоғырланатын орындарда біртұтас команда ретінде жұмыс атқаратын болады. Бұл өз кезегінде құқық бұзушылықтарды дер кезінде анықтаумен қатар, тұрғындар арасында мақсатты түсіндіру жұмыстарын жүргізуге мүмкіндік береді.
"Қауіпсіз аула" жобасы - жай ғана алдын алу шарасы емес, әрбір тұрғын үшін қолайлы әрі қауіпсіз орта қалыптастыруға бағытталған кешенді әрі жүйелі тәсіл. Мұнда тәртіп күш арқылы емес, заңға бағыну, өзара сенім және ортақ жауапкершілік негізінде қамтамасыз етіледі. Қауіпсіз әрі тыныш аула дәл осындай нақты қадамдардан бастау алады.
